Úkimet 2011 jylǵa arnalǵan ekonomıkalyq saıasattyń negizgi baǵyttary týraly málimdemeni bekitti
ASTANA. 18 qańtar. QazAqparat /Rýslan Ǵabbasov/ - Búgin Astanada QR Úkimetiniń, Ulttyq banktiń, Qarjy naryǵy men qarjy uıymdaryn retteý jáne qadaǵalaý agenttiginiń 2011 jylǵa arnalǵan ekonomıkalyq saıasatynyń negizgi baǵyttary týraly málimdemesi bekitildi.
Ekonomıkalyq damý jáne saýda mınıstri Janar Aıtjanovanyń aıtýynsha, 2011 jyly Úkimettiń, Ulttyq banktiń jáne qarjylyq qadaǵalaý agenttiginiń júrgizetin ekonomıkalyq saıasaty Qazaqstan ekonomıkasynyń básekege qabilettiligin arttyrýǵa, ekonomıkany ártaraptandyrýǵa baǵyttalǵan ındýstrııaldy-ınnovatsııalyq damýdyń baǵdarlamasyn júzege asyrýǵa, jumyspen qamtýdyń turaqtylyǵyn jáne halyq tabysynyń ósýin qamtamasyz etýge, sondaı-aq bilim berýdi, densaýlyq saqtaýdy jáne tilderdi damytýdy qosqanda adamzat kapıtalyn damytýdyń memlekettik baǵdarlamasyn júzege asyrýǵa baǵyttalmaq.
«Básekege qabilettilikti arttyrýǵa makroekonomıkalyq turaqtylyqty qamtamasyz etý, ınvestıtsııalyq jáne bıznes ahýaldy jaqsartý, tehnologııalyq jáne ınnovatsııalyq damý deńgeıi, sondaı-aq Keden odaǵy jáne biryńǵaı ekonomıkalyq keńistik aıasynda saýda kedergilerin azaıtý men ekonomıkalyq birigýdi keńeıtý esebinen qol jetkiziletin bolady»,-dedi vedomstvo basshysy.
Onyń sózine qaraǵanda, bıznes ahýaldy jaqsartý maqsatynda ortalyq deńgeıdegi sekildi óńirlik deńgeıde de ákimshilik kedergilerdi jáne ruqsat berý júıesin azaıtý jumysy jalǵaspaq.
«2011 jyly baǵa turaqtylyǵyn jáne jyldyq ınflıatsııa deńgeıin ustap turýdy qamtamasyz etý Ulttyq banktiń aqshalaı- nesıelik saıasatynyń basymdy baǵyty bolyp tabylady»,-dedi J. Aıtjanova.
