Úkimet 2011-2020 jyldarǵa arnalǵan «QR Tilderdi damytý baǵdarlamasyn» daıyndaýda
ASTANA. Mamyrdyń 28-i. QazAqparat /Jasulan Amanbaıuly/ - Úkimet 2011-2020 jyldarǵa arnalǵan «QR Tilderdi damytý baǵdarlamasyn» jasap jatyr. Bul týraly búgin Astanada ótken «Til. Ult jáne Táýelsizdik» atty respýblıkalyq ǵylymı konferentsııada QR Mádenıet mınıstrliginiń Jaýapty hatshysy Janna Qurmanǵalıeva málim etti,
dep habarlaıdy QazAqparat.
Onyń atap kórsetkenindeı, bul baǵdarlamada memlekettik tildi damytýdyń keshendi jumystaryna den qoıylyp, qazaq tiliniń fýnktsııalaryn keńeıtýge baǵyttalǵan sharalar engiziledi. Sonymen qatar elde tildi oqytýdyń ádistemelik bazasy, oqýlyqtar men oqytý úderisi kórinis tabady.
«Til - Qazaqstan halyqtaryn uıystyratyn, birligin nyǵaıtatyn faktor. Sondyqtan Elbasynyń tapsyrmasy boıynsha, Mádenıet mınıstrligi basqa da vedomstvolardyń jáne Qazaqstan qoǵamdastyǵynyń talqylaýyna sala otyryp, atalmysh baǵdarlamanyń jobasyn daıyndaýda», deıdi J. Qurmanǵalıeva.
QR Konstıtýtsııasynyń 15 jyldyǵyna arnalǵan konferentsııaǵa respýblıkanyń ár aımaǵynan 120-ǵa tarta til mamandary kelgen. Olar memlekettik tildi damytýdyń máselelerin talqyǵa salýda. «Bul konferentsııa 2011-2020 jyldarǵa arnalǵan «QR Tilderdi damytý baǵdarlamasyn» jasaqtaý barysyn talqylaýdyń bir kezeńi», deıdi mınıstrliktiń jaýapty hatshysy.
