Úkimet 2010 jylǵy respýblıkalyq bıýdjettiń negizgi parametrlerin atqardy - Esep komıteti
ASTANA. 23 mamyr. QazAqparat /Marlan Jıembaı/ - Úkimet 2010 jylǵy respýblıkalyq bıýdjettiń negizgi parametrlerin atqardy. Bul týraly búgin Parlamentte 2010 jylǵa arnalǵan respýblıkalyq bıýdjettiń oryndalýy týraly Esep komıtetiniń esebin usynǵan atalǵan vedomstvonyń basshysy Omarhan Óksikbaev aıtty.
«Bizdiń baǵalýymyzsha, Úkimet 2010 jylǵy respýblıkalyq bıýdjettiń negizgi parametrlerin atqarǵan, degenmen ony oryndaý barysynda 2 márte naqtylap, bıýdjetke 16 ret túzetý engizgen», - dedi ol.
Onyń atap ótýinshe, respýblıkalyq bıýdjettiń kiristeri men shyǵystarynyń atqarylýyna júrgizilgen taldaý men baǵalaý respýblıkalyq bıýdjettiń qalyptastyrylýy men atqarylýy, sondaı-aq makroekonomıkalyq kórsetkishterdi boljaý barysynda kemshilikterge jol berilgendi aıqyndalǵan. «Máselen, Úkimet elimizdiń ekonomıkasynyń damýy, álemdik ekonomıkanyń jandanýy, suranystyń qalpyna keltirilýi jáne syrtqy baǵa konıýnktýrasynyń turaqtalýy úderisterin jetkilikti dárejede zerdelemegen», - dedi Esep komıtetiniń tóraǵasy.
Salyq túsimderi boıynsha sandyq kórsetkishter negizinen oryndalǵanymen salyqtyq ákimshilik etýdiń tıimdiligin sıpattaıtyn sapalyq kórsetkishter tómendep otyrǵandyǵyn basa aıtqan O.Ókisikbaev: «Buǵan dálel, 2010 jyldyń sońynda salyqtyq bereshek 365 mlrd. teńgege, merziminde tólenbegen salyq 199 mlrd. teńgege jetip, ósý úderisi oryn alyp otyr. 2009 jylmen salystyrǵanda salyqtyq bereshek 1,8, merziminde tólenbegen salyq 1,9 esege ulǵaıǵan», - dedi.
