Úkimet 2010-2014 jyldarǵa arnalǵan «Jasyl damý» salalyq baǵdarlamasyn maquldady
ASTANA. Qykúıektiń 2-si. QazAqparat /Ernur Aqanbaı / - Búgin Úkimet 2010-2014 jyldarǵa arnalǵan «Jasyl damý» salalyq baǵdarlamasyn maquldady. Qorshaǵan ortany qorǵaý mınıstri Nurǵalı Áshimovtiń aıtýynsha, bul baǵdarlama Qazaqstannyń 2020 jylǵa deıingi strategııalyq damý josparyn jáne Memleket basshysynyń tikeleı tapsyrmasyn iske asyrýǵa baǵyttalǵan.
Baǵdarlamadaǵy jumys jasyl ekonomıkany damytý, qorshaǵan orta men densaýlyq komponentterine antropogendik áserdi tómendetý, tabıǵı ekojúıelerdi saqtaý jáne qalpyna keltirý, sondaı-aq qorshaǵan ortanyń sapasyn basqarý júıesin damytý jáne jetildirý syndy tórt baǵyt boıynsha júzege asyrylady.
Baǵdarlamany júzege asyrýǵa jalpy alǵanda 350 mlrd. teńge baǵyttaý kózdelip otyr. «Baǵdarlamany iske asyrý nátıjesinde kelesi kórsetkishterge qol jetkizý josparlanýda. Atmosferaǵa zııandy zattar shyǵaryndylarynyń tómendeý paıyzy 2009 jylmen salystyrǵanda 2014 jylǵa keminde 5,9 paıyzdy quraıdy. Lastaǵysh zattar tógindileriniń deńgeıi 2009 jylmen salystyrǵanda 2014 jylǵa keminde 3,5 paıyzdy quraıdy. 2014 jylǵa qaldyqtardyń túzilýine olardy qaıta óńdeý úlesi 22 paıyzdy quraıdy. Parnıktik gazdardyń jyldyq shyǵarymdylary kóleminiń tómendeýi 2014 jylǵa 1992 jylǵa qaraǵanda 1 paıyzǵa jetetin bolady. Kıikter sanynyń ósýi 2014 jylǵa 10 paıyzdy quraıdy. Orman otyrǵyzý kóleminiń jyl saıynǵy ulǵaıýy 2014 jylǵa 65 myń gektardy quraıtyn bolady», dedi N. Áshimov.
