Úkimet 2010-2014 jyldarǵa arnalǵan tarıftik saıasat jónindegi salalyq baǵdarlamany maquldady
ASTANA. Qyrkúıektiń 8-i. QazAqparat /Ernur Aqanbaı/ - Búgin Qazaqstan Úkimeti 2010-2014 jyldarǵa arnalǵan tarıftik saıasat jónindegi salalyq baǵdarlamany maquldady. Tabıǵı monopolııalardy retteý agenttiginiń tóraǵasy Nurlan Aldabergenovtyń aıtýynsha,
baǵdarlamanyń negizgi maqsaty - aktıvterdi jańǵyrtý men jańartýǵa ınvestıtsııalardy yntylandyrý, elektr energııasy men sýdy únemdeý, sýbektiler usynatyn qyzmetterdiń sapasyn arttyrý. Baǵdarlama tıimdi tarıftik saıasatty júrgizýge arnalǵan jáne negizgi 3 baǵyttan turady. Birinshi baǵyt - ınvestıtsııalyq tarıfter boıynsha jumys isteıtin tabıǵı monopolııa sýbektileriniń sanyn ósirý jáne ınvestıtsııalyq mindettemelerdiń oryndalýyn baqylaý. Ekinshi baǵyt - elektr energııasyna jáne sýǵa tutyný kólemine qaraı saralanǵan tarıfterdi engizý, sonymen qatar normatıvten tys ysyraptardy joıý jáne normatıvtik ysyraptardy ońtaılandyrý arqyly energııany únemdeý kózdelip otyr. Úshinshi baǵyt - shıkizat pen materıaldar, otyn men energııa shyǵysynyń, ákimshilik shyǵystardyń normalaryn ońtaılandyrý jolymen resýrstardy únemdeýge baǵyttalǵan. Baǵdarlama barlyq memlekettik organdarmen kelisilgen. Bul rette ony iske asyrý respýblıkalyq bıýdjetten aqshalaı qarajatty bólýdi kózdemeıdi. Úkimet músheleri baǵdarlamany biraýyzdan qoldady.
