Úkimet 1 mamyrǵa deıin ınflıatsııany orta merzimde 3-4 paıyzǵa deıin tómendetýge baǵyttalǵan sharalar keshenin ázirleıdi
ASTANA. QazAqparat - Úkimet 1 mamyrǵa deıin ınflıatsııany orta merzimde 3-4 paıyzǵa deıin tómendetýge baǵyttalǵan sharalar keshenin ázirleıdi. Bul týraly búgin QR Parlamenti Senattyń jalpy otyrysynda QR Ulttyq banki tóraǵasynyń orynbasary Qýat Qojahmetov málim etti.
Ulttyq bank Úkimetpen birlesip, ınflıatsııany 6-8 paıyz sheginde ustap turǵa tyrysatyndyǵyn basa aıtqan ol: «2014 jylǵy qańtarda jyldyq ınflıatsııa 4,5 paıyz boldy. Aqpanda onyń deńgeıi 5,4 paıyzǵa deıin ósti», - dedi.
Tóraǵa orynbasarynyń atap ótýinshe, bul ulttyq valıýta baǵamyn túzetýge baılanysty oryn alǵan.
«Úkimet pen Ulttyq bank 2014 jyldyń 1 mamyryna deıin ınflıatsııany orta merzimde 3-4 paıyzǵa deıin tómendetýge baǵyttalǵan sharalar keshenin ázirleıdi. Bul sharalar iske assa, ekonomıkanyń údemeli ósýi saqtalady», - dedi Q.Qojahmetov.
