Ýıtnı Hıýston óliminiń sebepteri jarııa etildi
ASTANA. 28 naýryz. QazAqparat - Ýıtnı Hıýston esirtkige elitip, vannadaǵy sýǵa tunshyǵyp óldi. Mundaı qorytyndyny amerıkandyq ánshiniń ólimine tergeý júrgizgen Los-Andjelestiń quqyq organdary jasady.
Málim etilgendeı, Hıýstonnyń aǵzasynan kokaın tabyldy. Ánshiniń júreginiń aqaýy bolǵandyqtan bul ony ólimge alyp kelgen faktorlardyń biri boldy. Komıssııa ókilderiniń biri - Kreıg Harvıdiń aıtýynsha, saraptama nátıjesi Hıýstonnyń esirtkige táýeldilikten zardap shekkenin kórsetken.
48 jastaǵy Ýıtnı Hıýstonnyń óli denesi 11 aqpan kúni Los Andjelestegi «Beverlı Hılton» qonaq úıinde vannada tabyldy. 19 aqpanda ánshi Fervıý zıratynda óziniń ákesi Djon Ressel Hıýstonnyń janyna jerlendi, dep habarlaıdy ITAR-TASS.
Ýıtnı Hıýston jıǵan-tergen dúnıe-múlkin óziniń 19 jastaǵy qyzy Bobbı Krıstınaǵa muragerlik etti. Ánshi bul qujatty 1993 jyly 3 aqpan kúni, qyzy dúnıege kelerden shamamen bir aı buryn jasaǵan bolatyn. Qujat ánshiniń óliminen keıin Atlantada (AQSh, Djordjııa shtaty) jarııa etildi. Mega ánshiniń sońǵy qalaýy boıynsha jalǵyz murager onyń bar aqshasyn, sondaı-aq jıhazdaryn, jeke zattaryn, kıim-keshekterin, zergerlik buıymdaryn jáne avtokólikterin alady. Degenmen, aqsha qarajattary arnaıy qorǵa salyndy. Olarǵa Bobbı Krıstına 21 jasqa tolǵannan keıin jartylaı, al 30 jasqa tolǵanda tolyǵymen ıelik ete alatyn bolady.
