Ýıtnı Hıýston qaıtys bolǵan qonaq úı týrıstik mekenge aınaldy
ASTANA. 15 aqpan. QazAqparat - 11 aqpanda tanymal ánshi Ýıtnı Hıýston qaıtys bolǵan Beverly Hilton qonaq úıi tezarada Los-Andjelestiń týrıstik kórikti oryndary tizimine engizildi.
Budan bylaı qala boıynsha saıahat barysynda týrısterge tanymal ánshi qaıtys bolǵan qonaq úıdi kórý usynylady, dep jazady amerıkalyq baspasóz basylymdary.
Sonymen qatar ekskýrsııa jetekshileri ánshiniń ómiri jaıly aıtyp beretin bolady. Degenmen, onyń óliminiń sebepteri týraly sóz qozǵamaıtyn kórinedi.
Jýyrda Whigham jerleý bıýrosynyń ókilderi Ý. Hıýstonnyń jerleý rásimi senbi kúni, 18 aqpanda Nıýarkada ótetinin habarlady. Ánshi ózi bala kezinde horda án aıtqan Nıý-Hoýp baptıstik shirkeýinde jerlenedi. Rastalmaǵan aqparat boıynsha, jerleý rásimi jabyq túrde ótedi.
Esterińizge sala keteıik, Ý. Hıýston 11 aqpanda Beverlı-Hıllz qalasynyń Beverly Hilton qonaq úıinde qaıtys bolǵan edi. Ánshi jýynatyn bólmede, sýdyń ishinen tabyldy.
