Ýıtkoff pen Kýshner Máskeýge keldi: Pýtınmen kezdesýde ne aıtyldy
ASTANA. KAZINFORM — Reseı prezıdenti Vladımır Pýtın AQSh prezıdentiniń arnaıy ókili Stıv Ýıtkoffpen jáne Donald Tramptyń kúıeý balasy Djared Kýshnermen Kremlde kezdesti. Bul týraly TASS agenttigi habarlady.
Amerıkalyq kelissóz júrgizýshiler senbi kúni Máskeýge keldi. Olardy Vnýkovo áýejaıynda Reseı prezıdentiniń sheteldermen ınvestıtsııalyq-ekonomıkalyq yntymaqtastyq jónindegi arnaıy ókili, Reseıdiń tikeleı ınvestıtsııalar qorynyń basshysy Kırıll Dmıtrıev qarsy aldy.
Kezdesýdiń basynda Vladımır Pýtın amerıkalyq ókilderden AQSh prezıdenti Donald Trampqa óziniń izgi tilegin jáne alǵysyn jetkizýdi surady.
Óz kezeginde Stıv Ýıtkoff kelissózder ótýi úshin Kıevke úsh kún boıy soqqy berýdi toqtatqany úshin Pýtınge alǵys aıtty.
Pýtınniń aıtýynsha, búgin túngi saǵat 00:00-den bastap Kıevke soqqy jasalǵan joq. Ol atysty toqtatý týraly ótinishtiń resmı arnalar arqyly túskenin aıtyp, Ýkraına tarapynyń shabýyl sanyn edáýir azaıtqanyn atap ótti.
Buǵan deıin Donald Tramp Stıv Ýıtkoff pen Djared Kýshnerdiń Máskeýge soǵysty toqtatýǵa qatysty usynys aparatynyn málimdegen. Alaıda Tramp bul usynys jańa bastamalarǵa qatysty ma degen suraqqa teris jaýap bergen.
Máskeýdegi kelissózderden keıin AQSh ókilderi Kıevke barýdy josparlap otyr. Bul olardyń soǵysty retteý máselesin talqylaý úshin Ýkraına astanasyna jasaıtyn alǵashqy sapary bolmaq.
Aıta keteıik, AQSh Prezıdenti Donald Tramp arnaıy ókili Stıv Ýıtkoff pen kúıeý balasy Djared Kýshnerdiń Ýkraınadaǵy jaǵdaıdy retteý jónindegi jańa mıssııamen Reseıge baratynyn rastady.
Buǵan deıin Axios Stıv Ýıtkoff pen Djared Kýshner Reseı-Ýkraına daǵdarysyn retteý joldaryn talqylaý úshin Máskeý jáne Kıevke baratynyn habarlaǵan.
