Ýıtkoff: HAMAS-tyń AQSh usynysyna jaýaby múlde qabyldaýǵa bolmaıdy
ASTANA. KAZINFORM – Palestınalyq radıkaldy HAMAS qozǵalysynyń Gazadaǵy atysty toqtatý týraly AQSh usynǵan bastamaǵa bergen jaýaby qabyldaýǵa kelmeıdi jáne kelissóz úderisin keıinge shegeredi. Bul týraly AQSh prezıdentiniń arnaıy ókili Stıven Ýıtkoff málimdedi, dep habarlaıdy TASS.
— Men HAMAS-tyń AQSh usynǵan bastamaǵa bergen jaýabyn aldym. Bul jaýap múlde qabyldaýǵa bolmaıdy jáne bizdi tek keıinge shegertedi, — dep jazdy AQSh prezıdentiniń arnaıy ókili Stıven Ýıtkoff X áleýmettik jelisinde.
Ýıtkofftyń aıtýynsha, HAMAS «Vashıngton usynǵan negizdemelik usynysty» janama kelissózderge negiz retinde qabyldaýy tıis, bul kelissózder kelesi aptada bastalýy múmkin.
— Tek osy jolmen ǵana biz aldaǵy kúnderi 60 kúndik atysty toqtatý týraly kelisimge kele alamyz. Bul kelisim aıasynda tiri qalǵan tutqyndardyń jartysy men qaza tapqandardyń deneleri úılerine, otbasylaryna qaıtarylady. Sonymen qatar, biz janama kelissózder barysynda izgi nıet rýhynda turaqty bitimge qol jetkizý úshin naqty máselelerdi talqylaı alamyz, — dedi ol.
Buǵan deıin palestınalyq HAMAS qozǵalysy AQSh prezıdentiniń arnaıy ókili Stıven Ýıtkofftyń Gazadaǵy atysty toqtatý jónindegi usynysyna óz jaýabyn ara aǵaıyndar arqyly joldaǵan edi.
HAMAS-tyń málimdemesinde bolashaq kelisim aıasynda qozǵalys «tiri qalǵan 10 ızraıldik tutqyndy bosatýǵa jáne 18 qaza tapqan tutqynnyń denesin qaıtarýǵa daıyn» ekeni aıtylǵan. Bul úshin Izraıl kelisilgen sandaǵy palestınalyq tutqyndardy túrmeden bosatýy tıis.
Sondaı-aq, HAMAS óz jaýabynda qozǵalystyń birqatar talaptaryn atap ótken. Atap aıtqanda, Gaza sektorynda atysty tolyq ári turaqty toqtatý, anklavtan ızraıldik áskerlerdi shyǵarý jáne gýmanıtarlyq kómektiń jetkizilýin qamtamasyz etý. Alaıda tutqyndardy naqty qandaı merzimde bosatatyny jaıly aqparat berilmegen.
29 mamyrda Ynet portaly Ýıtkofftyń jańa usynysy týraly habarlady. Oǵan sáıkes, anklavta 60 kúnge birden atysty toqtatý kózdelgen. Sondaı-aq, alǵashqy apta ishinde tiri qalǵan 10 tutqyn eki kezeńmen bosatylýy tıis.
Osy aptada HAMAS 18 qaza tapqan tutqynnyń denesin de Izraılge qaıtarýy kerek. Buǵan jaýap retinde Izraıl buǵan deıin bekitilgen tizimge sáıkes palestınalyq tutqyndardy bosatpaq.
Qujatta BUU men basqa da halyqaralyq uıymdar arqyly Gazaǵa gýmanıtarlyq kómekti jetkizýdi qaıta bastaý da qarastyrylǵan. Sol kúni-aq Aq úıdiń baspasóz hatshysy Kerolaın Lıvıtt brıfıngte Izraıl bul jospardy HAMAS-qa joldanar aldynda maquldaǵanyn habarlady.
Buǵan deıin Al Arabiya HAMAS pen Izraıl Gazada atysty 60 kúnge toqtatý jóninde kelisimge kelgenin habarlaǵan bolatyn.