Ýınston Cherchılldiń kózildirigi qomaqty somaǵa satylymǵa shyqty

ASTANA. KAZINFORM — Ýınston Cherchıll paıdalanǵan oqý kózildirigi óte joǵary baǵamen satylymǵa shyǵaryldy, dep jazdy AZÁRTADJ.

Cherepah pantsırinen jasalǵan dóńgelek jıekti kózildirik shamamen 80 000 AQSh dollaryna baǵalanyp otyr. Bul kózildirikter Ulybrıtanııa premer-mınıstri úshin Londondaǵy C. W. Dixey and Sons kompanııasynda arnaıy jasalǵan.

AZÁRTADJ sheteldik BAQ-qa silteme jasap habarlaǵandaı, Cherchıll bul kompanııanyń áıgili 1805 úlgisindegi dóńgelek jıekti, «qulyp tesigi» pishindi kópiri bar kózildirigin taqqan.

Ár jup kózildirik onyń bet pishinine dál sáıkes etip daıyndalyp, Cherchılldiń jeke talaptaryna saı jetildirilgen. Mysaly, kózildiriktiń shetki sabynyń ushtaryndaǵy aq núkteler olardyń ne úshin qoldanylatynyn bildirgen. Bul kózildiriktegi bir aq núkte — onyń oqýǵa arnalǵanyn kórsetedi. Basqa kózildirikter sóıleý, sýret salý jáne jazý maqsatynda arnaıy jasalǵan.

Kózildirikti Brıstol qalasyndaǵy Paul Fraser Collectibles kompanııasy satylymǵa shyǵarǵan. Onymen birge kózildiriktiń túpnusqa qaptamasy jáne óndirýshi kompanııanyń shyqqan tegin rastaıtyn qol qoıylǵan haty usynylady.

Kózildirikti kompanııanyń resmı veb-saıtynan satyp alýǵa bolady.

Aıta ketý kerek, C. W. Dixey and Sons kompanııasy 1777 jyly qurylǵan jáne búginge deıin jumysyn jalǵastyryp keledi. Bul — álemdegi eń kóne jáne táýelsiz kózildirik óndirýshi kompanııa bolyp sanalady. Ol birneshe onjyldyq boıy Brıtan koroldik otbasy úshin, sonyń ishinde jeti patsha men patshaıymǵa arnap kózildirik jasaǵan.

Eske sala keteıik, buǵan deıin Dıana hanshaıym men Ýınston Cherchılldiń ósıetteri jelige shyqqanyn jazǵan edik.