Ýımbldon týrnırindegi sensatsııa: Elena Rybakına tórtinshi aınalymnan tys qaldy
ASTANA. KAZINFORM — Qazaqstannyń birinshi, álemniń 2-raketkasy Elena Rybakına Ýımbldon týrnıriniń tórtinshi aınalymyna shyǵa almady.
Qazaqstandyq tennısshi úshinshi aınalymda álemniń 27-raketkasy, belgııalyq Elıze Mertenspen jolyǵysty.
Qarsylastar osyǵan deıin ózara segiz ret kezdesip, sonyń jeteýinde Elenanyń mereıi ústem bolǵan edi. Sonyń ishinde Rybakına Mertensti bıylǵy Aýstralııa ashyq chempıonatynyń tórtinshi aınalymynda 6:1, 6:3 esebimen utqan bolatyn.
Bul joly birinshi partııada tennısshiler qos breıkpen almasty. Taı-breıkte Mertens sátti oınady — 7:6 (7:4).
Ekinshi sette E.Mertens aıqyn basymdylyq kórsetti — 6:1.
Bir saǵat 37 mınýtqa sozylǵan básekede Rybakına 2 eıspen birge 10 breık-poınttyń tek ekeýin paıdalandy. Mertens 4 eıs, 4 breıkpen (10 breık-poınt) erekshelendi.
Osylaısha, E.Rybakına kútpegen jerden Ýımbldon dodasyn erte aıaqtady. Oǵan qosa álemniń 1-raketkasy bolý múmkindiginen de aıyryldy.
Eske sala keteıik, budan buryn Ýımbldon týrnırinde Elena Rybakınanyń ortalyq kortta qarsylasyn oısyrata jeńgenin jazǵan edik.
Sondaı-aq Aleksandr Býblık Ýımbldon týrnıriniń úshinshi aınalymyna shyqty.
