Ýımbldon týrnıri: Aleksandr Býblık alǵashqy qarsylasyn kambekpen jeńdi
ASTANA. KAZINFORM — Qazaqstannyń birinshi, álemniń 11-raketkasy Aleksandr Býblık Ýımbldon týrnıriniń ekinshi aınalymyna joldama aldy.
«Úlken dýlyǵa» dodasynyń 10-raketkasy bolyp tirkelgen qazaqstandyq tennısshi bastapqy kezdesýin reıtıngide 491-satydaǵy aýstralııalyq Tanası Kokkınakıspen ótkizdi.
Qarsylastar osyǵan deıin bir-aq ret kezdesken. 2018 jyly Akapýlko (Meksıka) ATP 500 jarysynyń alǵashqy aınalymynda Kokkınakıs 6:4, 6:3 esebimen utqan.
Bul joly aýstralııalyq sportshy oıyndy sátti bastady — 6:4.
Ekinshi sette Býblık ese qaıyrdy — 6:3.
Úshinshisinde Kokkınakıs taı-breıkte tarazy basyn ózine aýdardy — 7:6 (12:10).
Degenmen budan keıin qazaqstandyq tennısshi matchty jeńispen túıindeı bildi — 6:3, 6:4.
Úsh saǵat 39 mınýtqa sozylǵan tartysty matchta Býblık 28 eıspen birge 9 breık-poınttyń úsheýin paıdalandy. Kokkınakıs 27 eıs, 1 breıkpen (6 breık-poınt) kózge tústi.
Aleksandr Býblık úshinshi aınalymǵa shyǵý úshin reıtıngide 139-oryndaǵy frantsııalyq Kırııan Jakemen sheberlik talastyrady. Ol alǵashqy aınalymda álemniń 129-raketkasy, lıtvalyq Vılıýs Gaýbasty qapy qaldyrdy — 6:3, 6:4, 7:6 (7:2).
Ótken jyly Ýımbldonda A.Býblık birinshi kezdesýinde-aq jeńilip qalǵan bolatyn.
Eske sala keteıik, budan buryn Elena Rybakınanyń Ýımbldon týrnıriniń ekinshi aınalymyna shyqqanyn jazǵan edik.
