Ýımbldon týrnıri: Aleksandr Býblık álemniń jetinshi raketkasyna jol berdi
ASTANA. KAZINFORM — Qazaqstannyń birinshi, álemniń 11-raketkasy Aleksandr Býblık Ýımbldon týrnıriniń shırek fınalyna shyǵa almady.
Qazaqstandyq tennısshi tórtinshi aınalymda álemniń 7-raketkasy, amerıkalyq Teılor Frıtspen betpe-bet keldi.
Qarsylastar osyǵan deıin ózara segiz ret sheberlik baıqasqan, esep teń — 4:4.
Bul joly birinshi partııada taı-breıkte Frıts sátti oınady — 7:6 (7:1).
Ekinshi set sońynda da amerıkalyq tennısshi kúsh alyp ketti — 6:4.
T.Frıts úshinshi partııada 3:1 esebimen alǵa shyqty. Aqyry esesin jibergen joq — 6:4.
Qazaqstandyq tennısshiniń match sońyna taman oń jambasyn aýyrsynǵany baıqalyp turdy.
Bir saǵat 41 mınýtqa sozylǵan básekede Býblık 13 eıspen birge 3 breık-poınttyń bireýin paıdalandy. Frıts 23 eıs, 3 breıkpen (4 breık-poınt) kózge tústi.
Osylaısha, eresekter arasynda Ýımbldonda Qazaqstannan eshkim qalmady.
Jasóspirimder arasynda Zańǵar Nurlanuly men Damır Jalǵasbaı jarysty jalǵastyrýda.
Ótken jyly A.Býblık Ýımbldon dodasynda alǵashqy aınalymnan asa almaǵan edi. Bıyl sol kórsetkishin birshama jaqsartyp, tórtinshi aınalymǵa deıin jetti.
Eske sala keteıik, budan buryn Ýımbldon týrnırinde Damır Jalǵasbaıdyń jeńisti jolyn juptyq synda jalǵastyrǵanyn jazǵan edik.
