Ýımbldon tórinde óner kórsetkenime qýanyshtymyn – Beıbit Juqaev
ALMATY. KAZINFORM — Qazaqstandyq tennısshi, 24 jastaǵy Beıbit Juqaev bıyl sporttyq jolynda alǵash ret Ýımbldon týrnırinde oınady. Osyǵan oraı Kazinform tilshisi Almaty qalasynda turatyn Beıbitke birneshe saýal qoıǵan edi.
– Beıbit, alǵash ret Ýımbldon týrnırinde óner kórsettiń. Alǵan áseriń qandaı?
– Tórtkil dúnıe kóz tigetin «Úlken dýlyǵa» jarysyna qatysýdy bala kezden armandadym. Sol armanymnyń Ýımbldonda oryndalǵanyna qýanyshtymyn. Іrikteý saıysynan ótip, myqty qarsylaspen oınaýdyń ózi – úlken jetistik. Italııalyq Flavıo Kobollımen birinshi jáne ekinshi set óte tartysty bolyp, partııa taǵdyryn sáttilik sheshti. Úshinshi sette ol kúsh alyp ketti de, aýyr tıdi. Onyń ústine irikteý kezindegige qaraǵanda, negizgi jarystaǵy korttar ózgesheleý boldy. Oıyn kortynda bir-aq ret jattyqtym, sondyqtan bul jetkiliksiz edi. Maǵan bul kort tez oıynǵa arnalǵandaı kórindi. Ýaqyttyń tyǵyzdyǵynan bul tósenishke beıimdelip úlgermegen de shyǵarmyn. Árıne, qarsylastyń deńgeıi de joǵary, ol – TOP-25-ke kiretin oıynshy. Degenmen budan keıin de ósý úshin tájirıbe jınadym dep oılaımyn.
– Aldaǵy maqsat-josparyń jóninde ne aıtasyń?
– Qazirgi kezde tordyń janynda oınaý, dop qabyldaý, tez qımyldaý baǵytynda sheberligimdi ushtaı túspekshimin. Dene daıyndyǵy boıynsha jańa bapkerdi iske qostym. Soltústik Amerıkadaǵy týrnırlerge daıyndalýdamyn. Oǵan qosa ATP jarystaryna qatysýǵa bel býdym, bul chellendjerlerge qaraǵanda, kóbirek tájirıbe jınap, sheberlik deńgeıi joǵary tennısshilermen qarym-qatynas jasaýǵa járdemdesedi.
– Іri jarystarda qoldaý da mańyzdy ǵoı. Jaýapty sátte janyńda kimder boldy?
– Júıeli qoldaýsyz tabysqa jetý múmkin emes. Qazaqstan tennıs federatsııasy jasóspirim kezimnen qoldap keledi. Jarystarǵa wild cards (arnaıy shaqyrtý) beredi, jattyǵý korttary, qarjylandyrý bar — munyń bári sheshýshi ról atqarady. Bıyl da qoldaý jóninde kelisim jasalǵan.
Moraldyq qoldaý týraly aıtsam, negizgi jarysqa shyqqan kezde kúlli Qazaqstannyń maǵan jankúıer bolyp jatqanyn estidim. Bul – qazaqstandyq tennıs úshin, ásirese, Qazaqstanda ómir esigin ashqan oıynshy úshin jaqsy nátıje. Bul tennıs federatsııasy úshin de, elimiz úshin de eleýli tabys dep esepteımin. Bárine qoldaý úshin alǵysymdy aıtamyn.
– Aldaǵy dodalarda sáttilik tileımiz, Beıbit!
Eske sala keteıik, budan buryn Anna Danılınanyń Ýımbldon týrnırin jeńispen bastaǵanyn jazǵan edik.