Ýımbldon tennısshilerdiń talabynan keıin júlde qoryn kóbeıtti
ASTANA. KAZINFORM — 2026 jyly qatysýshylar ótken maýsymmen salystyrǵanda 20%-ǵa artyp, 64,2 mıllıon fýnt sterlıngke (85,7 mıllıon dollar) básekelesedi. Bul týrnır tarıhyndaǵy tólemderdiń eń úlken ósimi, dep habarlaıdy Reuters.
Ýımbldon erler men áıelder arasyndaǵy jekeleı synda jeńiske jetken oıynshylarǵa 3,6 mln fýnt sterlıng (shamamen 4,8 mln dollar) kóleminde júlde beriledi. Ótken jyly chempıondardyń júlde qory 3 mıllıon fýnt sterlıng bolǵan.
Sonymen qatar júlde qorynyń rekordtyq ósýine qaramastan, birqatar tennısshiler Úlken dýlyǵa týrnırleriniń qarjylyq modelin qaıta qaraýdy talap etip otyr. Olardyń pikirinshe, týrnır uıymdastyrýshylary tabystyń oıynshylarǵa bólinetin bóligin ATP jáne WTA týrnırlerimen salystyrǵanda tómen deńgeıde ustap keledi.
Oıynshylar ókilderi Ýımbldonnyń jalpy júlde qoryn shamamen 70 mln fýnt sterlıngke (shamamen 95 mln dollar) deıin arttyrýdy usynǵan. Bul jaǵdaıda tabysty bólý deńgeıi ATP jáne WTA týrnırlerine jaqyndaıdy, onda oıynshylar tabystyń shamamen 22%-yn alady. Al Úlken dýlyǵa jarysynda bul kórsetkish shamamen 15% deńgeıinde.
Debbı Djevanstyń aıtýynsha, Ýımbldon kommertsııalyq emes uıym jáne túsken tabystyń basym bóligin Ulybrıtanııadaǵy tennısti damytýǵa jumsaıdy. Onyń sózinshe, artyq qarajattyń shamamen 90%-y ulttyq tennıs júıesine qaıta ınvestıtsııalanady.
Júlde mólsherinen bólek, tennısshiler zeınetaqy júıesi, týrnırlik kesteniń keńeıýi, matchtardyń kesh aıaqtalýy jáne uıymdastyrýshylarmen baılanys máselelerin de kóterip otyr.
Osyǵan deıin qazaqstandyq shahmatshy Bıbisara Asaýbaeva Memleket basshysynan qoldaý kórsetýdi suraǵan edi. Týrızm jáne sport mınıstrligi onyń úndeýine jaýap berdi.
