Ýımbldon: Elena Rybakına úshinshi aınalymǵa joldama aldy

ASTANA. KAZINFORM – Qazaqstannyń birinshi, álemniń 11-raketkasy, 26 jastaǵy Elena Rybakına Ýımbldon týrnıriniń úshinshi aınalymyna shyqty.

Qazaqstandyq tennısshi ekinshi oıynyn álemdik reıtıngide kezinde 3-orynǵa deıin kóterilgen, qazir 77-satydaǵy grekııalyq, 29 jastaǵy Marııa Sakkarımen ótkizdi.

Qarsylastar osyǵan deıin bes ret kezdesip, sonyń tórteýinde Rybakına jeńgen edi. Bul joly qazaqstandyq tennısshi matchty sátti bastady – 2:0. Sodan keıin setti taǵy bir breıkpen túıindedi – 6:3. 

Ekinshi setti qarsylastar breık almasýmen bastady. Budan soń Elena des bermedi - 6:1

Bir saǵat 2 mınýtqa sozylǵan báseke barysynda Rybakına 6 eıspen birge 8 breık-poınttyń beseýin paıdalandy. Sakkarı 2 eıs, 1 breıkpen shekteldi.

Rybakına tórtinshi aınalymǵa shyǵý úshin álemniń 22-raketkasy, danııalyq Klara Taýson nemese reıtıngide 39-oryndaǵy reseılik Anna Kalınskaıanyń qaı jeńgenimen talasady. 

Qazaqstandyq tennısshiniń sporttyq jolyndaǵy eń úlken tabysy osy Ýımbldonmen baılanysty ekendigi belgili. Ol 2022 jyly qazaqstandyqtar arasynda alǵash ret jekeleı synda top jardy. Al ótken jyly jartylaı fınalǵa deıin jetti. 

Eske sala keteıik, budan buryn Anna Danılınanyń Ýımbldon týrnırin jeńispen bastaǵanyn jazǵan edik.