Ýımbldon: Elena Rybakına úshinshi aınalymǵa ótti

ASTANA. KAZINFORM — Qazaqstannyń birinshi, álemniń 4-raketkasy Elena Rybakına Ýımbldon týrnıriniń úshinshi aınalymyna ótti.

Qazaqstandyq tennısshi ekinshi aınalymda dúnıejúzilik reıtıngide 72-orynda turǵan germanııalyq Laýra Zıgemýndpen betpe-bet keldi.

Qarsylastar osyǵan deıin bes ret kezdesip, sonyń tórteýinde Rybakına jeńgen edi.

Bul joly birinshi partııada Elena 3:1 esebimen alǵa shyqqanymen, Zıgemýnd tarazy basyn teńestirdi. Degenmen qazaqstandyq sportshy qatarynan úsh geımdi aldy — 6:3.

Ekinshi setti germanııalyq sportshy breıkpen bastaǵanymen, Rybakına esepti teńestirdi — 2:2. Alaıda set Zıgemýndtiń enshisinde ketti — 6:3.

Úshinshi, sheshýshi sette Rybakına aqyry degenine jetti — 6:3.

Eki saǵat 12 mınýtqa sozylǵan tartysty matchta Elena 5 eıspen birge 12 breık-poınttyń tórteýin paıdalandy. Zıgemýnd 1 eıs, 3 breıkpen (13 breık-poınt) kózge tústi.

Elena Rybakına tórtinshi aınalymǵa shyǵý úshin álemniń 25-raketkasy, kanadalyq Leıla Fernandes nemese reıtıngide kezinde kósh bastaǵan, qazir 91-oryndaǵy danııalyq Karolına Voznıtskıdiń qaı jeńgenimen talasady.

Taǵy bir qazaqstandyq ıÝlııa Pýtıntseva juptyq synda danııalyq Klara Taýsonmen birge alǵashqy aınalymda reseılikter Elena Vesnına — Dıana Shnaıderge jol berdi — 6:4, 6:7. (6:8), 0:6.

ıÝ.Pýtıntseva jekeleı synda úshinshi aınalymda álemniń 1-raketkasy, Polsha ókili Iga Shventekpen oınaıdy. Iga ekinshi kezdesýinde horvatııalyq Petra Martıchti joldan taıdyrdy — 6:4, 6:3.

Eske sala keteıik, budan buryn Ýımbldonda Anna Danılınanyń ekinshi aınalymǵa joldama alǵanyn jazǵan bolatynbyz.

Sondaı-aq Tımofeı Skatov Frantsııadaǵy jarystyń shırek fınalyna shyqty.