Ýımbldon: Elena Rybakına alǵashqy qarsylasyn oısyrata utty

ASTANA. KAZINFORM – Qazaqstannyń birinshi, álemniń 11-raketkasy Elena Rybakına Ýımbldon týrnıriniń ekinshi aınalymyna shyqty.

Ýımbldon jarysynda 2022 jyly úzdik shyqqan qazaqstandyq tennısshi bul joly bastapqy kezdesýin dúnıejúzilik reıtıngide 49-orynda turǵan armenııalyq Elına Avanesıanmen ótkizdi.

Qarsylastar osyǵan deıin bir-aq ret kezdesip, onda Rybakına jeńgen edi.

Ótken jyly Ýımbldonda jartylaı fınalǵa deıin jetken qazaqstandyq sportshy birinshi partııada 5:0 esebimen alǵa ketti. Avanesıan esepti qysqartqanymen, Rybakına setti breıkpen támamdady – 6:2.

Ekinshi sette esep 2:1 bolǵan mezette Elena breık jasaı aldy. Sodan keıin taǵy bir breıkke qol jetkizip, matchty jeńispen túıindedi – 6:1.

Bir saǵatqa sozylǵan báseke barysynda Rybakına 3 eıspen birge 6 breık-poınttyń beseýin paıdalandy. Avanesıan 1 eıs, breıkpen (9 breık-poınt) Shekteldi.

Elena Rybakına úshinshi aınalymǵa shyǵý úshin kezinde reıtıngide 3-orynǵa deıin kóterilgen, qazir 77-satydaǵy grekııalyq Marııa Sakkarımen talasady. Ol alǵashqy aınalymda reıtıngide ózinen bir saty tómen turǵan reseılik Anna Blınkovany qapy qaldyrdy – 6:4, 6:4.

Ýımbldon dodasynda jekeleı synda Qazaqstannan jalǵyz E.Rybakına ǵana qaldy.

Reıtıngide 247-oryndaǵy Beıbit Juqaev alǵashqy aınalymda álemniń 24-raketkasy, ıtalııalyq Fabıo Kobollıge jol berdi – 3:6, 6:7 (7:9), 1:6.

Al reıtıngide 98-satydaǵy Aleksandr Shevchenko álemniń 70-raketkasy, amerıkalyq Reıllı Opelkaǵa ese jiberdi – 3:6, 5:7, 6:7 (4:7).

Eske sala keteıik, budan buryn Londonda Ýımbldon týrnıri bastalatynyn jazǵan edik.