Ýımbldon: Elena Rybakına álemniń eks 1-raketkasyn utyp, tórtinshi aınalymǵa shyqty

LONDON. KAZINFORM – Qazaqstannyń birinshi, álemniń 4-raketkasy Elena Rybakına Ýımbldon týrnıriniń tórtinshi aınalymyna shyqty.

Qazaqstandyq tennısshi úshinshi aınalymda kezinde myqtylardyń kóshin bastaǵan, qazir 91-orynda turǵan danııalyq, 2018 jylǵy Aýstralııa chempıonatynyń jeńimpazy, 33 jastaǵy Karolına Voznıatskımen sheberlik baıqasty.

Birinshi partııada Rybakına bet qaratpady – 6:0.

Sál tartystylaý órbigen ekinshi sette Elena 3:1 esebimen alǵa shyqty. Taǵy bir breık – 5:1. Aqyry matchqa dop bergende, qatelesken joq – 6:1.

Nebári 58-mınýtqa sozylǵan matchta Rybakına 9 eıspen birge 11 breık-poınttyń beseýin paıdalandy.

Osylaısha, Ýımbldonnyń tórtinshi aınalymynda Qazaqstannan ıÝ.Pýtıntseva men E.Rybakına oınaıdy.

Elena Rybakına shırek fınalǵa shyǵý úshin álemniń 18-raketkasy, reseılik Anna Kalınskaıamen talasady. A.Kalınskaıa úshinshi aınalymda otandasy, álemniń 15-raketkasy Lıýdmıla Samsonovadan aılasyn asyrdy – 7:6 (7:4), 6:2.

A.Kalınskaıa qazaqstandyq tennısshi úshin qaýipti qarsylas deýge bolady. Osyǵan deıin ózara tórt ret kezdesken, esep teń – 2:2. Sońǵy kezde reseılik tennısshi sátti oınap, naǵyz babynda ekendigin kórsetip júr. Onyń ústine álemniń 1-raketkasy, ıtalııalyq ıAnnık Sınnermen mahabbat aıdynynda birge júrgen Kalınskaıanyń kóńil-kúıi de kóterińki.

E.Rybakına 2022 jyly qazaqstandyqtar arasynan alǵash ret Ýımbldon chempıony atansa, ótken jyly shırek fınalǵa deıin jetken edi.

Qazaqstannyń juptyq syndaǵy birinshi, álemniń 52-raketkasy Anna Danılına qytaılyq Sıýı Ifanmen birge Ýımbldonnyń ekinshi aınalymynda amerıkalyqtar Korı Gaýff – Djessıka Pegýlaǵa jol berdi – 2:6, 6:7 (3:7).

Eske sala keteıik, budan buryn Dmıtrıı Popkonyń Rýmynııada kambek jasap, jartylaı fınalǵa shyqqanyn jazǵan bolatynbyz.

Sondaı-aq Tımofeı Skatov Frantsııadaǵy jarystyń fınalynda oınaıdy.

Ýımbldonda ıÝlııa Pýtıntseva álemniń 1-raketkasyn jeńip ketti.