Ýımbldon: Aleksandr Býblık jarys jolynan shyǵyp qaldy

ASTANA. KAZINFORM – Qazaqstannyń birinshi, álemniń 31-raketkasy Aleksandr Býblık Ýımbldon týrnıriniń ekinshi aınalymyna óte almady.

Jarystyń 28-raketkasy bolyp tirkelgen qazaqstandyq tennısshi bastapqy oıynyn álemdik reıtıngide 55-orynda turǵan ıspanııalyq Haýme Mýnıarmen ótkizdi.

Bul qos sportshynyń ózara alǵashqy kezdesýi edi.

Birinshi partııada Mýnıar 3:1 esebimen alǵa shyǵyp, sol qarqynynan tanǵan joq – 6:4.

Ekinshisinde esep 3:2 bolǵan mezette Býblık breık jasaı bildi – 6:3.

Úshinshi sette ıspanııalyq tennısshi 3:1 esebimen alǵa ketkenimen, Býblık alysqa uzatpady – 3:3. Sodan keıin taǵy bir breık jasap, óz geımin de aldy – 6:4.

Tórtinshi partııada esep 1:1 bolǵanda, qazaqstandyq sportshy breıkke qol jetkizdi. Alaıda esep 5:4 bolyp, matchqa dop bergende, sol múmkindigin múlt jiberdi. Taı-breıkte Mýnıardyń asyǵy alshysynan tústi – 7:6 (7:5).

Sheshýshi, besinshi sette Mýnıar jeńisti julyp aldy – 6:2.

Úsh saǵat 25 mınýtqa sozylǵan básekede Býblık 21 eıspen birge 12 breık-poınttyń tek beseýin júzege asyrdy. Mýnıar 8 eıs, 6 breıkpen (9 breık-poınt) kózge tústi.

H.Mýnıar úshinshi aınalymǵa shyǵý úshin álemniń 58-raketkasy, majarstandyq Fabıan Marojanmen talasady. Ol alǵashqy aınalymda reıtıngide 181-satydaǵy aýstralııalyq Djeıms Makkeıbti joldan taıdyrdy – 6:1, 6:4, 6:3.

Ótken jyly A.Býblık Ýımbldonda úshinshi aınalymǵa deıin jetken edi.

Eske sala keteıik, budan buryn Londonda Ýımbldon týrnıri bastalatynyn jazǵan edik.

Atalmysh doda qazaqstandyqtar úshin sátsiz bastaldy. Keshe reıtıngide 33-oryndaǵy ıÝlııa Pýtıntseva álemniń 12-raketkasy, amerıkalyq Amanda Anısımovadan oısyraı utyldy – 0:6, 0:6.