Ýılıam hanzada BBC efırinde Qazaqstannyń kıik popýlıatsııasyn qalaı qalpyna kletirgenin aıtty
ASTANA. KAZINFORM – Ulybrıtanııa hanzadasy Ýılıam Qazaqstannyń kıik popýlıatsııasyn qalpyna keltirýdegi jetistigin joǵary baǵalady. Ol bul týraly 23 qazanda BBC arnasynda kórsetilgen Grem Nortonnyń The Graham Norton Show baǵdarlamasynda aıtqan.
Hanzada bir kezderi joıylyp ketý qaýpi tóngen kıikter sanynyń qazir aıtarlyqtaı kóbeıgenin atap ótti.
Baǵdarlamada Qazaqstandaǵy kıikter týraly áńgime qozǵalǵanda, Ýılıam hanzada bir kezderi joıylyp ketý qaýpi asa joǵary bolǵan janýarlardyń sany qazir kúrt kóbeıgenin atap ótti. Onyń sózinshe, buǵan Qazaqstan úkimetiniń kıikti qorǵaýǵa erekshe mán berýi yqpal etken.
- Bul kıikter bir kezderi joıylyp ketý qaýpi asa joǵary janýarlardyń qataryna kirgen. Al qazir olardyń sany qaıtadan kúrt kóbeıdi. Buǵan Qazaqstan úkimetiniń osy janýardyń el úshin de, tabıǵatty qorǵaý isi úshin de qanshalyqty mańyzdy ekenin túsinip, ony saqtaýǵa bar kúshin salýy sebep boldy, - dedi ol.
Aıta ketý kerek, Qazaqstandaǵy kıik sanynyń sońǵy resmı kórsetkishi 2026 jylǵy kóktemgi sanaqta jarııalandy. Orman sharýashylyǵy jáne janýarlar dúnıesi komıtetiniń Kazinform agenttigine bergen jaýabyna sáıkes, eldegi kıik sany 4 mıllıon 689 myń basqa jetken.
Qazaqstanda kerqulan men Balqash barysynyń popýlıatsııasyn qalpyna keltirý jumystary da bastaldy. Bıyl 31 shildede Úmit esimdi urǵashy jolbarys Balqashtyń aýmaǵyndaǵy tabıǵı ortaǵa jiberildi. Bul – Qazaqstanda 70 jyldan astam ýaqyttan keıin jolbarysty tarıhı mekenine qaıtarý baǵdarlamasynyń alǵashqy praktıkalyq qadamy.
Janýarǵa spýtnıktik qarǵybaý taǵylyp, onyń qozǵalysy men jańa ortaǵa beıimdelýi táýlik boıy baqylanyp otyr.
