Ýıll Smıt «Oskar» kınoakademııasynan shyǵatynyn málimdedi

NUR-SULTAN. QazAqparat - «Oskar» júldesin tapsyrý saltanatynda júrgizýshi Krıs Rokty uryp jibergen Ýıll Smıt Amerıka kınematografııalyq óner jáne ǵylym akademııasynan shyǵatynyn málimdedi, dep habarlaıdy QazAqparat CNN-ge silteme jasap.

Bul keleńsizdikten keıin atalǵan uıym akterdiń tártibi qaralatynyn jarııalaǵan bolatyn. «Smıt Akademııanyń tártip standarttaryn buzdy. Biz onyń máselesin 18 sáýirge josparlanǵan dırektorlar keńesi otyrysynda qaraımyz», - degen edi Akademııa prezıdenti Devıd Rýbın.

Munan soń akter uıym quramynan óz erkimen shyǵatynyn jáne basqarma qabyldaǵan kez kelgen sheshimdi qabyldaıtynyn málim etti. «Oskardyń» 94-saltanatyndaǵy qylyǵym jaǵa ustatarlyq boldy. Keshirilmeıtin jaıt. Krısqa ǵana emes, onyń otbasyna, meniń kóptegen dostarym men jaqyndaryma, saltanatqa jınalǵandarǵa – aýqymdy aýdıtorııaǵa aýyr tıdi. Akademııanyń senimin aqtamadym. Jetistikterimen kózge túsken ózge nomınanttardyń merekelik kóńil kúıin buzdym», - deıdi ol.

Aıta keteıik, Ýıll Smıt júrgizýshi tarapynan áıeline qatysty aıtylǵan ázilge ashýlanǵan bolatyn. Alopetsııa aýrýyna shaldyqqan Djada Pınkett-Smıt shashy túsip qalǵandyqtan, basyn taqyrlap tastaýǵa májbúr bolǵan.

Ý.Smıt kınojuldyzdar, rejısserler men prodıýserlerdiń basyn biriktirgen tanymal uıymnan shyǵatyn bolsa, ol «Oskar» syılyǵyna úmitker fılmder men spektaklderge daýys bere almaıdy. Alaıda, onyń jumystary júldege usynylatyn tizimnen shettetilmeıdi.