Ýılıam Vendlı: Qazaqstan álemdegi barlyq dinderge kómek qolyn sozyp otyr

ASTANA. QazAqparat - Álemdegi dinder arasynda berik kópir ornatý - bir kúnniń nemese bir konferentsııanyń atqarar sharýasy emes. Dinaralyq baılanysty jolǵa qoıý - óte uzaq protsess. Álemdik jáne dástúrli dinder kóshbasshylarynyń VI sezinde «Búkilálemdik dinder beıbitshiligi kúni» konferentsııasynyń Bas hatshysy Ýılıam Vendlı osyndaı pikir bildirdi, dep habarlaıdy QazAqparat tilshisi.

«Sóz basynda dinder arasyndaǵy yntymaqtastyq máselesiniń ómirlik mańyzy bar ekenin erekshe atap ótkim keledi. Sondaı-aq, bul máseleniń sheshimin tabý - bizdiń ujymdyq kúsh salýymyzdyń negizi. Óz tájirıbeme súıene otyryp aıtar bolsam, KSRO kúıregennen keıin ıÝgoslavııa memleketi tarap, bunyń arty ózara qaqtyǵystarǵa ákep soqty. Biraq, ol kezde de, odan beri de ártúrli konfessııalar men din túrlerinde yntymaqtasyp, ózara qarym-qatynas ornatý mehanızmi bolǵan emes», - deıdi ol.

Ýılıam Vendlıdiń aıtýynsha, qazir álem dinder arasynda baılanys ornatýdyń eń alǵashqy satysynda ǵana tur.

«Álemdik saıasatkerler BUU-ny moıyndap, ártúrli dinı odaqtar, úkimettik komıssııalar quryp, seriktesýdiń amal-ádisterin izdestiredi. Álemdik deńgeıde dinder keń taralyp, oryn tepken jerinde óz ınfraqurylymyn qurǵan. Olardyń tarıhy tereńde. Mine, búgin biz Astanaǵa osynaý dinı ortalyqtardyń bári ózara baılanys ornata alýy úshin jınalyp otyrmyz. Astanada biz barlyq dinı birlestikti biriktire alatyn jahandyq ınfraqurylym qurý jolynda turmyz. Dinı birlestikter qarym-qatynasyn retke keltirip, ortaq moraldyq qaǵıdattarmen almasa alatyndaı bolýy kerek. Men bul jerde tek teorııa týraly sóılep otyrǵan joqpyn. Birneshe azamattyq soǵystyń kýási bolǵan adammyn. Memleketter qaqtyǵysqan toptardy bir ústeldiń basyna jınaı almaı qınalatyn. Dinge keler bolsaq, dál osy din - memleketterdi birlikke shaqyra alatyn názik kúsh dep aıtýǵa bolady. Búgingi jumystyń nátıjesi - naqty praktıkalyq sheshimderge alyp keledi», - deıdi ol.

Ýılıam Vendlı óz sózinde dinaralyq baılanysty nyǵaıtýda saıasat pen dinniń róli qandaı bolatynyn aıtyp berdi.

«Qazaqstan qazirgi ýaqytta bir-birimen yntymaqtasýy úshin álemdegi barlyq dinderge kómek qolyn sozyp otyr. Bizge eń aldymen din kóshbasshylarynyń arasyndaǵy senim kerek. Ol úshin Astanadaǵy osynaý sezdiń mańyzy zor. Kelesi qadam retinde dinı kóshbasshylar óz halqyna, birlestikterine ekinshi tarapta jaý emes, nıettes dostardyń turǵanyn túsindirýi kerek. Ol úshin bir kún, bir konferentsııa, bir apta jete qoımas. Men bunyń óte uzaq protsess ekenin sezip otyrmyn», - dedi Ýılıam Vendlı.