Ýılıam hanzada men Keıt Mıddltonnyń úılený toıyndaǵy bir tilim tort 500 dollarǵa baǵalanýda
ASTANA. QazAqparat - Áıgili Julien's bássaýda úıi kezekti saýdany júrgizýge daıyndalyp jatyr. Shara 5-6 jeltoqsan kúnderi ótedi dep josparlanýda. Onda úsh jyl buryn Ýılıam hanzadanyń úılený toıynda óz qolymen qonaqtaryna dám tatyrǵan torttyń bir tilimi basty lotqa aınalmaq.
Tátti taǵamdy kondıter sheberleri jas jubaılardyń barlyq tilekterin eskere otyryp ázirledi. Tsýkattar men jańǵaqtar qosylǵan tort 8 qabattan turdy. Ústindegi úsh qabatty jas jubaılar ózderine alyp qalyp, qalǵan qabattaryn birneshe bólikterge bólip, qonaqtarǵa taratqan. Soǵan qaraǵanda, hanzadanyń dostarynyń biri ózine usynylǵan táttiniń bóligin saqtap qalǵan, endi sodan paıda tabýdy kózdeýde. Ulybrıtanııa patshaıymynyń arnaıy qaǵazyndaǵy toltyrylmaǵan toıǵa shaqyrtý tortpen qosa berilgen. Bul lottyń bastapqy baǵasy 500 dollardy quraıdy. Alaıda uıymdastyrýshylar bul baǵanyń 1-2 myń dollarǵa deıin kóterilýi múmkin deıdi. Aıta keteıik, birneshe jyl buryn osyndaı bássaýdada 1981 jyly úılengen Dıana hanshaıym men Charlz hanzadanyń toıynan qalǵan tort tilimi satylǵan edi, dep habarlady segodnya.ua.
