ÚIIDB aıasynda úsh jyldyń ishinde 10 myńnan astam maman daıarlanady - Bilim vıtse-mınıstri

ASTANA. QazAqparat - ÚIIDB aıasynda magıstranttardy daıarlaýǵa basymdyq berilmek. Bul týraly QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR Bilim jáne ǵylym vıtse-mınıstri Takır Balyqbaev málim etti.

T. Balyqbaevtyń aıtýynsha, magıstranttardy oqytýǵa kóp ýaqyt ketpeıdi, sonyń arqasynda olar bakalavr mamandaryna qaraǵanda eldegi ındýstrııalandyrý naýqanyna erterek aralasa alady.

"Údemeli ındýstrııalyq-ınnovatsııalyq damý baǵdarlamasyna qajetti mamandardyń kólemin anyqtap jatyrmyz. Aldaǵy úsh jylda 10 myńnan astam maman daıyndaý qajet bolyp tur. Sol sebepti biz aldaǵy oqý jylynan bastap, osy mamandardy daıyndaýdy bastaımyz. Qazir bul mamandardy baǵdarlyq magıstratýra deńgeıi boıynsha oqytý jóninde usynys engizildi. Sebebi oqýdyń ýaqyty 1,5 jyl. Bakalavr boıynsha daıyndasaq, 4-5 jyl ketedi jáne 2019-2020 jyldary ǵana oqýlaryn aıaqtaıdy. Ol kezde ındýstrııalandyrý baǵdarlamasy aıaqtalyp taqalady. Sondyqtan ÚIIDB sheńberinde magıstrlardy daıyndaýdy josparlaýdamyz", - dep atap ótti ol.

Vıtse-mınıstrdiń sózinshe, 2017 jyly memlekettik tapsyrys boıynsha 3 myńnan asa maman daıyndaý kózdelýde. "Osy oqýdyń jańa baǵdarlamasy qurylatyn bolady. Ony sheteldik áriptestermen jáne joǵary oqý oryndarymen birlesip daıyndamaqpyz", - dedi Tákir Balyqbaev.

Onyń aıtýynsha, aımaqtarda tehnıkalyq mamandardy daıarlaý isine belsendi aralasatyn 11 joǵary oqý oryndary anyqtaldy. Olar arnaıy daıyndyq jumystaryn júrgizýdi bastap ta ketti.