Ý I: ALLUR — tek zaýyt qana emes, ulttyq brend qalyptastyrýǵa negiz
ASTANA. KAZINFORM — Qytaıdyń jetekshi «Jenmın jıbao» basylymynyń bastamasymen 29 mamyrda «Ortalyq Azııa — Qytaı» halyqaralyq medıaforýmy ótip jatyr. Іs-sharanyń teń uıymdastyrýshysy — Qazaqstan Respýblıkasy Prezıdentiniń Teleradıokesheni.
Ashylý rásiminde arnaıy shaqyrylǵan qonaq — Qytaıdyń Genertec International Holding Co., Ltd. kompanııasy bas dırektorynyń orynbasary Ý I sóz sóılep, Qazaqstannyń avtokólik ónerkásibin derbes ulttyq brendke aınaldyrýdaǵy qytaılyq kásiporyndardyń rólin erekshe atap ótti.
— ALLUR — jaı ǵana qurastyrý zaýyty emes, tolyqqandy ǵylymı-zertteý jáne tehnologııalyq múmkindikteri bar Qazaqstannyń ulttyq avtokólik brendine aınalýy kerek, — dedi Ý I óz baıandamasynda.
Ol Genertec International Holding kompanııasy 2019 jyly ALLUR kompanııasyna ınvestıtsııa quıǵannan keıin, onyń jyldyq óndirisi 100 myń danaǵa deıin óskenin, al búginde bul kásiporyn Qazaqstanda tolyq jınaqtaý (CKD) óndirisin ıgergen jalǵyz avtokólik óndirýshisi ekenin aıtty.
Onyń aıtýynsha, kompanııa 2026 jyly iske qosylatyn avtokólik qosalqy bólshekterin shyǵaratyn jańa zaýyt arqyly taǵy 600 jumys ornyn ashpaq. Sonymen qatar, qytaılyq JETOUR kompanııasymen birlesip tehnıkalyq mamandardy oqytý jobasy aıasynda júzdegen qazaqstandyq maman daıarlanǵan. Bul sharalar Qazaqstandaǵy avtoónerkásiptiń tehnologııalyq áleýetin arttyryp, «Ortalyq Azııada óndirip, Eýrazııaǵa taratý» ındýstrııalyq tizbegin qalyptastyrýǵa yqpal etpek.
Ý I sonymen qatar Qytaı men Ortalyq Azııa elderi arasyndaǵy kólik jáne energetıka salasyndaǵy ózge de jobalar týraly qysqasha baıandap ótti. Atap aıtqanda, Ózbekstandaǵy 100 MVt qýatyndaǵy jylý elektr ortalyǵy, Qazaqstandaǵy 150 MVt jel elektr stantsııasy jáne Grýzııadaǵy E60 halyqaralyq avtomagıstrali syndy iri jobalar Ortalyq Azııanyń jasyl damý baǵytyna naqty úles qosyp otyrǵanyn jetkizdi.
Forým aıasynda Ý I Ortalyq Azııadaǵy BAQ ókilderin yntymaqtastyqty kúsheıtýge shaqyryp, qytaılyq jáne jergilikti kásiporyndardyń birlesken tabystary týraly shynaıy oqıǵalardy kópshilikke jetkizýdiń mańyzdylyǵyn atap ótti. Onyń aıtýynsha, forýmnan keıin delegattar Almatydaǵy ALLUR 4S ortalyǵyna baryp, Qytaı avtokólik brendteriniń jergilikti naryqpen qalaı yqpaldasyp jatqanyn óz kózderimen kóredi.
— Shańannan Samarqanǵa deıin — Uly Jibek jolynyń basty rýhy — ózara tıimdilik pen senim. Biz Ortalyq Azııamen ortaq bolashaqty birge qurý jolynda medıa men óndiris arasyndaǵy baılanysty tereńdete beremiz, — dedi Ý I.
Aıta keteıik, forýmnyń ashylý saltanatynda Qytaıdyń Qazaqstandaǵy Tótenshe jáne Ókiletti elshisi Han Chýnlın negizgi baıandama jasap, Qytaı men Ortalyq Azııa elderi arasyndaǵy dostyqty nyǵaıtý men ortaq taǵdyr qaýymdastyǵyn qalyptastyrýda buqaralyq aqparat quraldarynyń mańyzyn atap ótti.