Ýhan naýqastaryna «Qara jorǵa» bıi qalaı kómektesti
ALMATY. QazAqparat – Almatyda Qytaıdan kelgen dárigerler delegatsııasynyń onlaın sabaqtary jalǵasyp jatyr, dep habarlaıdy QazAqparat tilshisi.
Búgin pýlmonolog dáriger Tsıý Gaýnfeng naýqastarǵa psıhologııalyq kómek kórsetýdiń mańyzdylyǵy týraly aıtty.
Onyń aıtýynsha, oqshaýlanǵan adamdar júıkesi juqaryp, sharshaıdy. Sonymen qatar olardyń júris-turysyna tyıym salynady.
Sol úshin patsıenttermen sóılesip, jattyǵý júrgizip turǵan durys.
Qytaı dárigeri mysal retinde qazaq dárigeriniń «Qara jorǵa» bıiniń Ýhandaǵy koronavırýspen aýyrǵan naýqastarǵa qalaı kómekteskenin aıtyp berdi.
«Naýqastarmen vıdeobaılanys arqyly sabaq ótkizip, únemi baılanysta bolǵan jón. Ár patsıentpen jeke kúnine 2 ret tynys alý júıesin jaqsartatyn jattyǵý jasap, bı bıleý kerek. Bizde modýldi aýrýhanalardyń birinde ulty qazaq dárigerlerdiń biri «Qara jorǵa» bıin bıleýdi úıretti. Bul patsıentterdi emotsııalyq jaǵynan da, fızıkalyq jaǵynan da bir serpiltip tastaǵany ras. Osy bıden keıin patsıentterdiń kópshiligi birazǵa deıin eńseleri tik, kóterińki kóńil kúımen júrdi», - dedi dáriger Tsıý Gaýnfeng.
Aıta ketý kerek, Almatyda Qytaı dárigerleriniń onlaın sabaqtary jalǵasyp jatyr.
