Ýhan qalasynda alǵash ret qazaqstandyq taýar óndirýshilerdiń saýda mıssııasy ótti

Qazaqstannyń Qytaıǵa bıznes-delegatsııasyn Saýda jáne ıntegratsııa vıtse-mınıstri Qaırat Tórebaev basqardy. Ýhan qalasyndaǵy isker toptarmen kezdesýde ol bizdiń elderimiz arasyndaǵy saýdanyń oń damýyn atap ótti, dep habarlaıdy QazAqparat vedomstvo saıtyna silteme jasap.

Bıyl mamyr aıynan bastap Qytaı Qazaqstannyń saýda seriktesteri arasynda jetekshi orynǵa ıe boldy. Tek 2022 jyldyń qorytyndysy boıynsha Qazaqstan men QHR arasyndaǵy ózara taýar aınalymy 24 mlrd dollardan astam tarıhı eń joǵary deńgeıge jetti. 2023 jyldyń 7 aıynda Qazaqstan men Qytaı arasyndaǵy saýda kólemi ótken jyldyń sáıkes kezeńimen salystyrǵanda 20,6%-ǵa ulǵaıyp, 16,3 mlrd dollar boldy.

«Qytaı naryǵy bizdiń ónimderimizdiń turaqty jáne talapshyl tutynýshysyn bildiredi. Qazaqstan Qosymsha 135 taýar pozıtsııasy boıynsha $1 mlrd astam somaǵa ónerkásiptik jáne aýyl sharýashylyǵy taýarlarynyń baı assortımentin usynýǵa daıyn», - dedi Qaırat Tórebaev bıznes-forýmda.

Bizdiń elimiz Qytaımen saýda-ekonomıkalyq yntymaqtastyqqa erekshe kóńil bóledi. QR jáne QHR Memleketteri basshylarynyń baǵalaýy boıynsha aldaǵy jyldary elderimiz arasyndaǵy ózara saýda kólemi $40 mlrd deıin ulǵaıýy múmkin.

Qytaılyq satyp alýshylar qazaqstandyq aýyl sharýashylyǵy ónimderiniń joǵary sapasyn tolyq baǵalaı aldy. Azyq-túlik Qytaı naryǵynda eń úlken suranysqa ıe. Muny saýda mıssııasynyń nátıjeleri rastap otyr. Bıznes-kezdesýlerdiń qorytyndysy boıynsha kásipkerler 28 mln dollarǵa un, jumyrtqa kespesi, kondıterlik ónimder, ósimdik maılary men jemshóp jetkizýge kelisimsharttar jasasty.

«Ýhan qalasyna saýda mıssııasy kompanııalarǵa ózderiniń eksporttyq áleýetin kórsetýge tamasha múmkindik beredi, sondaı-aq Hýbeı provıntsııasy úshin qazaqstandyq taýarlardy ashady», - dep atap ótti vıtse-mınıstr.

Otandyq taýar óndirýshilerdiń Qytaıǵa qazirgi bıznes-mıssııasy bıylǵy jyly ekinshi orynda. Mamyr aıynda QR Saýda jáne ıntegratsııa mınıstrligi eksportty memlekettik qoldaý sharalarynyń operatory QazTrade-men birlesip Sıan qalasyna 37 kásipker úshin iskerlik sapar uıymdastyrdy. Qazaqstannyń Sıandaǵy Bas konsýldyǵy janynan qazaqstandyq taýarlardyń shoý-rýmy ashyldy.

Tamyz aıynda qazaqstandyq kompanııalar QHR Sıntszıan-Uıǵyr avtonomııalyq aýdanynyń Úrimshi qalasynda ótken «Qytaı-Eýrazııa» halyqaralyq kórmesine qatysty. Bul rette Qazaqstannyń ulttyq stendi 40 el men óńir arasyndaǵy kórmedegi úzdikterdiń birine aınaldy. Ótken is-sharalardyń qorytyndysy boıynsha jalpy somasy 203,4 mln dollarǵa jýyq taýarlardy eksporttyq jetkizý týraly ýaǵdalastyqqa qol jetkizildi. Al qarasha aıynda Qazaqstan óz ónimderin Shanhaı ımporttyq kórmesinde usynady.