Ýhandaǵy mektepterde oqý qaıta jandanady
ÝHANЬ. Sınhýa-QazAqparat – Koronavırýs ınfektsııasynyń epıtsentri sanalatyn Qytaıdyń Ýhan qalasynda oqý bitiretin joǵary synyptardy qospaǵanda oqýshylardyń bárine oqý qaıta bastalady. Bul týraly QazAqparat tilshisi Sınhýa agenttigine silteme jasaı otyryp habarlaıdy.
10 shildeden bastap bıyl oqýdy bitirmeıtin joǵary dárejedegi orta mektepterdiń oqýshylary qaıtyp oralady. Olarmen birge kásibı-tehnıkalyq ýchılışede bilim alýshylar da qaıta oqýyn jalǵastyrady. Olardyń jazǵy demalystary 31 shildede bastalady.
Tómengi dárejedegi orta mektepterdiń oqý bitirmeıtin synyptaryndaǵy oqýshylar ózderiniń onlaın-sabaqtaryn 5 shildede aıaqtaıdy. 10 tamyz kúni muǵalimder men oqýshylar 30 tamyzǵa deıin jalǵasatyn sabaqqa kirisedi. Al bastaýysh mektepter men balabaqshalardyń jazǵy demalysy 5 shildede bastalady.
Joǵary oqý oryndarynyń oqý bitirmeıtin stýdentteri qajettilik týyndamaǵan jaǵdaıda kampýsqa qaıtyp kelýge mindetti emes. Olar ótinim berip, qaıtyp kelgisi kelse JOO-larynan ruqsat alýy tıis.
Mektepten tys oqý uıymdary epıdemııany baqylaý jáne aldyn alý boıynsha tıisti talaptardy oryndaǵan jaǵdaıda sabaqtaryn jandandyra alady. Bul týraly Ýhan qalasynyń bilim basqarmasy bastyǵynyń orynbasary Sıa Shýnın habarlady.
Hýbeı provıntsııasy 13 maýsymnan bastap qoǵamdyq densaýlyq saqtaý salasynda tótenshe jaǵdaılarǵa qaraı shuǵyl áreket etý deńgeıin ekinshiden úshinshige túsirdi. Dúısenbidegi jaǵdaı boıynsha provıntsııada aýrý belgisi joq bir adamnyń medıtsınalyq baqylaýda jatqany habarlanǵan.
