Ýhanda medıtsınalyq qaldyq alty ese artty – The Wall Street Journal

ÝHANЬ. QazAqparat - Ýhanda medıtsınalyq qaldyq alty ese ósip, bılik qaldyqty qaıta óńdeýge arnalǵan ondaǵan oryn ashty. Qytaı sheneýnikteri 29 qaladaǵy medıtsınalyq qaldyq óńdeıtin oryndar úzdiksiz jumys itep jatqanyn aıtty. Endi AQSh Qytaıdyń osy tájirıbesin baqylaýǵa kóshti, dep jazady The Wall Street Journal.

«AQSh-ta qaldyqty qaıta óńdeıtin kompanııalar aýrýhanalardyń qoqys shyǵarý kólemi artqanyn aıtyp otyr. Ásirese, Amerıkada maska, qolǵap pen halat qaldyqtary artqan. Medıtsınalyq qaldyqtardy, ınfektsııalyq qoqystardy kómip nemese órtemes buryn kompanııa býmen sterıldeý ádisin qoldanady. Degenmen, federaldy retteý organdary medıtsınalyq oryndardan shyǵatyn qoqys kólemi artqandyqtan, bıologııalyq suıyqtyq tıgen qoqys qana óńdeýge jatatynyn, qalǵany qarapaıym qoqysqa teńestiriletinin málimdedi», - dep jazady avtor.

Onyń aıtýynsha, qarapaıym qoqysqa teńestirilgen maskalar kompanııa qyzmetkerlerin alańdatyp otyr. Tipti, keıbir aýrýhanalar bul qoqystardyń órtelgeni durys ekenin aıtypty.

«Infektsııa juqqan qoqystarǵa qatysty alańdaýshylyq artty. Turmystyq qaldyqtardy ýtılızatsııalaý baǵdarlamasy toqtaǵandyqtan, qoqysty qolmen suryptaıtyndardyń ómirine qaýip tóndi. Ǵalymdardyń aıtýynsha, koronavırýs plastık pen temirde 72 saǵatqa deıin saqtalyp turady», - dep jazady avtor.