Ýhanda QR men QHR ókilderi kedergisiz spýtnıktik baılanysty qoldanysqa engizýdi jaıyn sóz etti
ASTANA. QazAqparat - Qytaıdyń Ýhan qalasynda Qazaqstan, Reseı men Qytaı elderiniń Baılanys ákimshiliginiń úılestirý kezdesýi ótti, dep habarlaıdy «QazAqparat» HAA tilshisi.
QR Ulttyq baılanys jáne habar taratý operatory - «Respýblıkalyq ǵaryshtyq baılanys ortalyǵy» AQ (RǴBO) QR Baılanys ákimshiligi delegatsııasynyń quramynda qytaılyq tarappen kelissózder júrgizdi.
«RǴBO» AQ baspasóz qyzmetiniń aqparaty boıynsha, úshjaqty kezdesý kezinde ózara tıimdi jaǵdaıda «KazSat-2» jáne «Chinasat-12» spýtnıkterin qoldanysqa berýdi qamtamasyz etý máseleleri talqylandy.
«2011 jyly ushyrylǵan Qazaqstannyń «KazSat-2» jer serigi 86.5° shyǵys boılyq orbıtalyq pozıtsııasynda tursa, 2012 jyldyń sońynda ushyrylǵan Qytaıdyń «Chinasat-12» spýtnıgi 87.5° shyǵys boılyqta ornalasqan. Eki ǵarysh kemesiniń turǵan núktesiniń arasynda bir gradýs qana aıyrmashylyq bar, sondyqtan eki spýtnıkti de «kedergisiz» qoldanysqa berýdi qamtamasyz etý máselesi kóterildi», - dedi kezdesýge qatysqan «RǴBO» AQ vıtse-prezıdenti Baýyrjan Qudabaev.
Qytaı Baılanys ákimshiliginiń ókili Dý Tınshan Qazaqstan men Reseı delegatsııalarynyń kezdesýge qatysqandary úshin rızashylyǵyn bildirdi. Bul kezdesýde qytaılyq tarap bastamashylyq etti, dep atap ótti RǴBO baspasóz qyzmeti.
Kezdesý sońynda taraptar operatoraralyq deńgeıde úılestirýshilik talqylaýdy jalǵastyrý týraly kelisimge keldi. 2018 jyly Qazaqstan men Qytaı Baılanys ákimshilikteri barlyq baılanys ǵarysh qurylǵylarynyń tehnıkalyq parametrleri kórsetilgen qujatqa qol qoıady jáne eki spýtnıktiń de paıdalaný sıpattamalary kelisiletin bolady.
