Ýhanda «Qara jorǵa» bılep tanylǵan qazaq dárigeri úıine oraldy

NUR-SULTAN. QazAqparat - «Qarajorǵa» bılep, tanymal bolǵan Qytaıdaǵy qazaq dárigeri Bahargúl Tolqyn úıine oraldy. Qandasymyz sol ólkedegi Shyńjańnyń týmasy. Bul týraly QazAqparat Qazaqstan arnasyna silteme jasap habarlaıdy.

Hırýrg-dáriger eki aı boıy, eń qaýipti oshaq Ýhanda bolyp, naýqastardy emdeýge kómektesti. Bilikti maman qaterli dertpen kúrese júrip ádemi bıimen emdelýshilerdiń kóńilin kótergen edi.

Bahargúldiń otbasyn kórmegenine 3 aıǵa jýyqtaǵan. Ata-anasyn, joldasyn, ásirese ulyn qatty saǵynǵanyn aıtady. Іndetti jeńip, úıine aman-esen oralǵan sáti keń dastarhan basynda jalǵasty. Baýyrsaq, qurt, qazy-qarta, shujyq. Qandastarymyz jyraqta júrse de, qazaqtyń dástúrin umyt qaldyrmaǵan.

«Ýhan halqyna kóńil bólýin bildirttim. Ózim qazaq bolǵannan keıin, halyq bıi qarajorǵany sol jerde bılep berdim. Ýhan halqy ishinde jatqan naýqastar sondaı jaqsy kórdi. Sizder ózderińizdi ózderińiz jigerlenip osyndaı kóńil kúıde bolsańyz aýrýdy jeńesiz degen oıda boldym» - deıdi Bahargúl Tolqyn.

Dárigerdiń biliktiligi men meıirimdiliginiń arqasynda qanshama naýqas aıaqtan turdy.

«Qazaqstan halqyna aıtatynym birinshisi úıden shyqpaý, ekinshisi úıden shyqqasyn mask taǵý. Úshinshiden ózińizdi ózińiz jaqsy ustap, kóńil kúı jaqtan taımaý kerek, tórtinshisi kóptegen etti jep, sútti iship, aıran iship, jaqsy tamaqtardan jep deneniń aýqatyn jaqsy qylý. Biz sizder myna kúrdeli vırýstan tezirek jeńýine tilektespin», - deıdi B.Tolqyn.

Eske salsaq, «Qara jorǵa» bıi koronavırýstan emdelip jatqan naýqastarǵa demeý bolǵany týraly jazǵan bolatynbyz.