Úgitilgen velojol: Aqtóbede jobalyq-smetalyq qujaty joq qurylysqa kelisim bergen sheneýnik sottaldy
AQTÓBE. KAZINFORM – Turǵyn úı – kommýnaldyq sharýashylyq bóliminde tórt jyl buryn basshynyń mindetin atqarǵan Janbolat Qusmuhambetov 3 jylǵa bas bostandyǵynan aıyryldy. Ol velojoldyń jobalyq-smetalyq qujaty bolmasa da, alǵashqy kelisimshartqa qol qoıǵan.
Sot kabınetindegi derekke súıensek, is aldymen Qylmystyq kodekstiń «Senip tapsyrylǵan bóten múlikti ıemdenip alý nemese talan-tarajǵa salý» baby boıynsha sotqa tústi. Keıin Qylmystyq kodekstiń «Laýazymdy ókilettilikterdi teris paıdalaný» babyna ózgertildi.
- Janbolat Qusmuhambetov Qylmystyq kodekstiń 361 baby 4 bóligi 3 tarmaǵymen aıypty dep tanylyp, 3 jylǵa bas bostandyǵynan aıyrý jazasy taǵaıyndalsyn. Jazasyn óteý orny - qylmystyq atqarý júıesiniń qaýipsizdigi ortasha mekemesi, - dedi sýdıa Aqmaral Alıeva.
Sottalýshynyń qorǵaýshylary úkimmen kelispeıtinin, apellıatsııalyq shaǵym túsiretinin málimdedi. Tipti sot otyrysy kezinde isti toqtatý týraly usynys berdi.
- Bul 2021 jyly qalalyq turǵyn úı-kommýnaldyq sharýashylyq bóliminde basshynyń mindetin atqarýshy boldy. Sonda jarty jyl jumys istedi. Velojol salý týraly kelisimshartqa qol qoıady. Keıin ony basqa qyzmetke aýystyrady. Ol ári qaraı bul jumysty atqarmaǵan. Odan keıin bólimde 4 basshy boldy. Olar aqsha aýdarǵan, orynbasarlary tekserýinde bolǵan. Al Janbolat Qusmuhambetov ol kezde múlde bolmaǵan. 2021 jyly birinshi kelisimshartqa qol qoıǵanda bar bolǵany 15 mln teńge aýdarylǵan. Negizi kelisimshart jasalady, máslıhat sheshimimen aqsha kezeń-kezeńimen aýdarylady. Tergeý jobalyq-smetalyq qujaty bolmaǵan joba bolǵan soń nege kelisimshartqa otyrady dep tur, - dedi qorǵaýshy Baýyrjan Imanov.
Ákimdik saıtyndaǵy aqparatqa súıensek, Janbolat Qusmuhambetov Aqtóbe qalalyq qurylys bóliminiń basshysy qyzmetine 2022 jyly taǵaıyndaldy.
Eske salsaq, Aqtóbe oblysy boıynsha ishki memlekettik aýdıt departamentiniń basshysy Sáken Qasymovtyń aıtýynsha, quny 1,3 mlrd teńge bolatyn jobada jobalyq-smetalyq qujat bolmaǵan. Keıin 665 761 900 teńgeniń jumysy atqaryldy dep aqsha aýdarylǵan. Aýdıt kezinde 34 mln teńgeden astam qarjynyń jumysy atqarylmaǵany belgili boldy.