Úgit - nasıhat naýqany aıaqtalǵan soń úgit júrgizgender ákimshilik jaýapqa tartylady - OSK múshesi T.Ohlopkova
ANA. 31 naýryz. QazAqparat /Aıdar Ospanalıev/ - 3 sáýirge taǵaıyndalǵan kezekten tys Prezıdent saılaýynyń úgit-nasıhat sharalaryn júrgizý merzimi aıaqtalǵan soń, ıaǵnı 2 sáýirden bastap úgit júrgizgen adam ákimshilik jaýapqa tartylady.
Bul týraly búgin jýrnalısterge bergen suhbatynda Ortalyq saılaý komıssııasynyń múshesi Tatıana Ohlopkova málim etti.
Onyń sózinshe, 1 sáýir kúni túngi saǵat 24-00-de kezekten tys Prezıdent saılaýynyń úgit-nasıhat naýqany aıaqtalady. «Al 2 sáýirden bastap, kez-kelgen úgitke tyıym salynady. Úgit jumystaryn júzege asyrǵan saılaýshy bolsyn, saıası partııa men qoǵamdyq birlestik ókili bolsyn ákimshilik jaýapqa tartylady. Buny elimizdiń barlyq azamattary bilýleri kerek»,-dedi OSK múshesi.
Onyń aıtýynsha, belsendi saılaý quqyǵy bar Qazaqstan Respýblıkasynyń kez-kelgen azamaty qandaı da bir sebepterge baılanysty saılaýshylar tizimine enbeı qalsa jáne ýchaskelik saılaý komıssııasy ony saılaýshylar tizimine engizýden bas tartsa, tizimge enbeı qalǵan azamat joǵarǵy turǵan saılaý komıssııalary men sotqa shaǵymdana alady. Saılaý kúni osy tektes aryz-shaǵymdardyń barlyǵy quzyrly organǵa túsken mezette qaralady.
