Ýgandadaǵy Albert kólinde qaıyq aýdarylyp, 30 adam qaza tapty
PRETORIıA. QazAqparat – Ýganda elindegi Albert kólinde qaıyqtyń aýdarylýy saldarynan kem degende 30 adam sýǵa batyp ketti. Bul týraly QazAqparat ońtústikafrıkalyq SABC radıostansasyna silteme jasap habarlaıdy.
«Oqıǵa 22 jeltoqsannyń keshinde oryn aldy. Bul kezde balyqshylar aýlaǵan balyqtaryn alyp, jaǵaǵa shyǵýǵa daıyndalyp jatqan. Qaıyqtyń ishinde 47 adam boldy, sondaı-aq bazarda satýǵa arnalǵan balyq tasymaldanǵan. Aılaqqa jaqyndaǵan kezde, qaıyq aýdarylyp ketken», - dep málimdedi Rýnga kentindegi port qyzmetkeri Ashraf Oromo.
Onyń aıtýynsha, 30 adam qaza tapqan, 12 adam qutqaryldy, qalǵandary iz-tússiz joǵalǵan.
Albert kóli Afrıkada kólemi jaǵynan jetinshi orynda, Nil ózeniniń joǵary jaǵynyń sý júıesine kirip otyr. Ol Ýganda men Kongo Demokratııalyq Respýblıkasynyń shekarasynda ornalasqan. Kóldiń uzyndyǵy – 160 shaqyrym, eni – 30 shaqyrym. Tereńdigi – 51 metr.
