Ýgandadaǵy laı kóshkini 9 adamnyń ómirin qıdy
ASTANA. KAZINFORM — Apta basynan beri jaýǵan nóser jańbyrdan keıin Ýgandanyń shyǵysyndaǵy Býkvo jáne Kven okrýgterin kóshkin basyp, 9 adam kóz jumdy. Onyń ishinde 6 adam bir otbasynyń múshesi, dep habarlaıdy ANEWZ.
Jergilikti bıliktiń habarlaýynsha, apat qatty jańbyr saldarynan bolǵan. Sebeı shaǵyn aýdanynda birneshe úıdi sý basyp, laı kóshken. Úsh bala Býkvo okrýginde, taǵy 6 bala kórshi Kven okrýginde qaıtys boldy.
Jergilikti basshy Djýdıt Chelangat túngi saǵat 3-ter shamasynda apat týraly habar berilgenin aıtty.
— Olar maǵan «Kaptang aýylynyń turǵyndary kóshkin saldarynan kóz jumdy. Kómekke kelińiz» dedi. Joldasymdy oıatyp, oqıǵa ornyna jedel jettik, — dedi ol.
Djýdıt Chelangat tabıǵı apattan keıin okrýgterde qırandylar kóp ekenin aıtty.
— Adamdardyń aıqaılaǵanyn estidik, biraq biz olarǵa jete almadyq, qutqara almadyq. Kómek suraǵandarǵa jetemin degenshe, tańǵy saǵat 5 shamasy boldy. Ol úıdiń ishindegiler qaza tapty. Kórshi úıdegi eki adam aman qaldy, óıtkeni olar qashyp úlgergen, — dedi Djýdıt Chelangat.
Ýganda Qyzyl Krestiniń qyzmetkerleri máıitter men zattardy alý úshin qalyń balshyqty qazyp jatqan turǵyndarǵa kómektesti.
— Laı barlyq jerdi jaılap ketken, birde-bir úı balshyqtan kórinbedi. Biraz jumystan keıin máıitterdi alyp shyqtyq. Úsh otbasy zardap shekti, 6 adam qaıtys boldy, taǵy 4-ýi aýyr jaraqat alyp, qazir aýrýhanada jatyr, — dedi Qyzyl Krest qyzmetkeri Moses Checho.
Sondaı-aq kóshkin Kapchorva-Sýam jolyndaǵy kólik qozǵalysyn toqtatty. Bul jerde SIT kópiri sý tasqynynyń astynda qalǵan. Tolassyz jaýǵan jańbyr men joldyń nashar jaǵdaıy tótenshe jaǵdaılar qyzmetkerleriniń shalǵaı aýdandarǵa qatynaýyna kedergi keltirdi.
Jergilikti bılik, Ýganda Qyzyl kresti jáne qaýymdastyq músheleri joǵalǵan turǵyndardy tabý jáne qonys aýdarǵan otbasylarǵa kómektesý úshin birlesip jumys istedi. Kaptang aýylynyń dronmen túsirgen kadrlarynda aýyl sharýashylyǵy jerleri balshyqqa toly ekenin jáne úılerdiń izi ǵana kórinedi.
Sońǵy jyldary tabıǵı apat Ýgandanyń taýly aımaqtarynyń klımattyq kóshkinderge osaldyǵyn kórsetti.
Byltyr osy elde bolǵan kóshkinnen 14 adam qaza tapqan bolatyn.