Ýgandada mektep avtobýsy apatqa ushyrap, 20 oqýshy mert boldy
ASTANA. KAZINFORM – Ýgandada mektep oqýshylaryn alyp bara jatqan avtobýs jol apatyna ushyrap, keminde 21 adam, onyń ishinde 20 oqýshy kóz jumdy, dep habarlaıdy Sınhýa.
Qaıǵyly oqıǵa beısenbi kúni keshke Kapchorva okrýgine qarasty Chekvatı aýylynda bolǵan.
Polıtsııanyń málimetinshe, avtobýs el astanasyndaǵy bastaýysh mektepterdiń biriniń oqýshylaryn Sıpı sarqyramasyna uıymdastyrylǵan ekskýrsııadan keri alyp kele jatqan.
Aldyn ala málimet boıynsha, keri qaıtar jolda júrgizýshi kólikti basqara almaı qalǵan. Sonyń saldarynan avtobýs joldan shyǵyp ketip, jol jıegindegi úlken jartasqa soǵylyp, aýdarylǵan.
— Qoldaǵy málimetke sáıkes, keri qaıtar jolda avtobýs júrgizýshisi kólikti basqara almaı qalǵan. Avtobýs joldan shyǵyp, jol jıegindegi úlken jartasqa soǵylyp, aýdaryldy, — dedi Jol qozǵalysy jáne jol qaýipsizdigi basqarmasynyń resmı ókili Maıkl Kananýra.
Apat saldarynan birneshe adam túrli deńgeıde jaraqat aldy. Zardap shekkenderge medıtsınalyq kómek kórsetilip jatyr.
Quqyq qorǵaý organdary jol-kólik oqıǵasynyń naqty sebepteri men mán-jaıyn anyqtaý úshin tergeýdi jalǵastyryp jatyr.
Osyǵan deıin Ýgandadaǵy jol apatynan 14 adam qaza tapqany týraly jazdyq.
