Ýgandada Ebola indetiniń jańa jaǵdaılary anyqtaldy
ASTANA. KAZINFORM — Ýganda aýmaǵynda Ebola vırýsyn juqtyrýdyń taǵy úsh jańa jaǵdaıy anyqtaldy. Osylaısha, ınfektsııa juqtyrǵandardyń jalpy sany bes adamǵa jetti, dep habarlaıdy TASS.
Bul týraly eldiń densaýlyq saqtaý mınıstrligi habarlady.
— Vırýs Ýganda azamattary — júrgizýshi men medıtsına qyzmetkeri, sondaı-aq kórshiles Kongo Demokratııalyq Respýblıkasynan kelgen áıelden tabylǵan. Іndetti juqtyrǵan eki adam buǵan deıin osy dertke shaldyqqan naýqaspen baılanysta bolǵan adamdardy tekserý kezinde anyqtalǵan, — dep málimdedi vedomstvo.
Mamandardyń aıtýynsha, sońǵy úsh apta ishinde el aýmaǵynan shyqpaǵan eki ýgandalyqtyń aýrý juqtyrýy ınfektsııanyń el ishinde tarala bastaǵanyn kórsetýi múmkin.
Buǵan deıin Ýganda bıligi el astanasy Kampala qalasyndaǵy aýrýhanada Eboladan kórshiles Kongo Demokratııalyq Respýblıkasynyń azamaty qaıtys bolǵanyn habarlaǵan edi. Ol indettiń qazirgi oshaǵy sanalatyn Kongonyń Itýrı provıntsııasynan kelgen. Bul óńir Ýgandamen shektesedi.
Al ekinshi naýqasqa qatysty jaǵdaı áli naqty emes. Ol da — Kongo Demokratııalyq Respýblıkasynyń azamaty. Qaıta júrgizilgen zerthanalyq taldaýlar onyń qanynan Ebola vırýsyn rastaǵan joq. Alaıda bul onyń saýyǵyp ketkenin bildire me, álde bastapqy dıagnoz qate qoıyldy ma — ázirge belgisiz.
Kongo Demokratııalyq Respýblıkasy men Ýganda bıligi 15 mamyr kúni óz aýmaqtarynda Ebola indetiniń órshýi bastalǵanyn jarııalady.
Dúnıejúzilik densaýlyq saqtaý uıymynyń málimetinshe, qazir indetten 177 adam qaıtys bolyp, taǵy shamamen 750 adam vırýs juqtyrdy degen kúdikke ilingen.
Aıta keteıik, Kongo Demokratııalyq Respýblıkasynyń shyǵysyndaǵy Ebola indetiniń oshaǵyna aınalǵan aýrýhananyń bir bóligine ashýly top shabýyl jasap, oqshaýlaý shatyrlaryn órtep jiberdi.
