Ýgandada 41 adam búlikshilerdiń qolynan qaza tapty

MPONDVE. QazAqparat - Ýgandada kóterilisshiler orta mektepke shabýyl jasap, 41 adam qaza tapty. Onyń 38-i stýdent, dep habarlaıdy QazAqparat Euronews-ke silteme jasap.

Ýganda bıligi Kongo shekarasyna jaqyn jerdegi Mpondve qalasyndaǵy orta mektepte búlikshilerdiń shabýylynan qaza tapqan 41 adamnyń máıitin tapty.

Jergilikti bıliktiń habarlaýynsha, shabýyldaýshylar jataqhanany órtegennen keıin adamdarǵa oq atylǵan, soıylmen uryp óltirgen nemese órtep jibergen.

Qaza tapqandardyń arasynda 38 mektep oqýshysy, bir kúzetshi jáne eki jergilikti turǵyn bar. Taǵy segiz adam jaralanyp, altaýyn urlap áketken.

Ýganda áskerıleri urlanǵan stýdentterdi qutqarý úshin Kongoǵa qashyp úlgergen qylmyskerlerdi qolǵa túsirýge tyrysyp jatqanyn málimdedi.