Ýganda resmı túrde Ebola vırýsynan azat el mártebesine ıe boldy
ASTANA. KAZINFORM — Ýganda bıligi elde 42 kún boıy Ebola vırýsyn juqtyrýdyń jańa jaǵdaıy tirkelmegennen keıin indettiń aıaqtalǵanyn jarııalady. Aýrý órshigen kezeńde elde barlyǵy 20 juqtyrý deregi rastaldy, onyń 15-i Kongo Demokratııalyq Respýblıkasynan (KDR) ákelingen jaǵdaılar bolǵan. Bul týraly Kazinform agenttigi TASS-qa silteme jasap habarlady.
Ýganda Densaýlyq saqtaý mınıstrligi X áleýmettik jelisinde jarııalaǵan málimdemesinde mamyr aıynda tirkelgen Ebola indetiniń tolyq aıaqtalǵanyn habarlady.
— Ýganda resmı túrde Ebola vırýsynan azat el mártebesine ıe boldy, — dedi eldiń Densaýlyq saqtaý mınıstri Krıs Baromýnsı.
Onyń aıtýynsha, mundaı sheshim el ishinde vırýs juqtyrǵan sońǵy naýqas 16 maýsymda aýrýhanadan shyqqannan keıin bastalǵan 42 kúndik baqylaý kezeńiniń sátti aıaqtalýyna baılanysty qabyldanǵan.
Jalpy Ýgandada 20 adamnan Ebola vırýsy anyqtaldy. Olardyń 15-i kórshiles Kongo Demokratııalyq Respýblıkasynan kelgen, al taǵy bes adam Ýganda aýmaǵynda vırýs juqtyrǵan. Naýqastardyń ekeýi — KDR azamattary — kóz jumsa, qalǵan 18 adam tolyq saýyǵyp shyqqan.
Sonymen qatar Dúnıejúzilik densaýlyq saqtaý uıymy (DDU) 17 shildede Ýgandada kúsheıtilgen 42 kúndik epıdemıologııalyq baqylaý kezeńi KDR-dan kelgen sońǵy naýqas aýrýhanadan shyǵarylǵannan keıin ǵana bastalǵanyn habarlaǵan bolatyn. DDU talaptaryna sáıkes, osy merzim ishinde jańa jaǵdaılar tirkelmese, indet tolyq aıaqtaldy dep esepteledi.
Ýganda Densaýlyq saqtaý mınıstrligi bul sheshimniń qabyldanýyn sońǵy syrttan ákelingen jaǵdaıdyń kózi men vırýstyń taralý tizbekteri tolyq anyqtalǵanymen túsindirdi. Sondaı-aq qaýip tobyna kirgen barlyq adamdar mindetti medıtsınalyq baqylaýdan ótken. Vedomstvo elde buryn anyqtalǵan juqtyrý tizbekterine qatysy joq jańa jaǵdaılar tirkelmegenin málimdedi.
Ebola indeti 15 mamyrda Kongo Demokratııalyq Respýblıkasynyń shyǵysynda jáne Ýgandada tirkelgen bolatyn. Aýrýdyń negizgi oshaǵy KDR-dyń Itýrı provıntsııasynda ornalasqan. Jalpy indet Kongonyń bes provıntsııasyn qamtydy.
Eske salaıyq, buǵan deıin Frantsııada Ebola vırýsyn juqtyrýdyń alǵashqy jaǵdaıy tirkelgeni habarlanǵan edi. Sondaı-aq Kongo Demokratııalyq Respýblıkasynda Ebola indetinen 1 405 adam qaıtys bolǵany málim boldy. Dúnıejúzilik densaýlyq saqtaý uıymy eldegi jaǵdaıdy daǵdarystyq deńgeıdegi indet dep baǵalap, juqtyrý derekteriniń artýyna, qarjylandyrýdyń jetkiliksizdigine jáne shuǵyl sharalar qabyldaý qajettigine nazar aýdarǵan bolatyn.
