Ýganda halqy álemdegi eń jas monarh bolǵan korolin aqtyq saparǵa shyǵaryp saldy
ASTANA. KAZINFORM – Ýgandadaǵy dástúrli Toro koroldiginiń koroli, uzaq ýaqyt boıy álemdegi eń jas monarh sanalǵan IV Oıo Nımba Kabamba Igýrý Rýkıdı ata-babalary jerlengen Karambı qabirlerine jerlendi. Bul týraly Moskovskıı komsomolets basylymy jazdy.
Oıonyń murageri bolyp taǵaıyndalǵan telejúrgizýshi Edvard Rýkıdı Kıdjanangoma Karambı koroldik qabirlerindegi Oıonyń qabirine toǵyz kofe dánin tastap, osylaısha Batys Ýgandadaǵy koroldikte bıliktiń resmı túrde berilgenin bildirdi.
Oıo 1995 jyly úsh jasynda taqqa otyryp, álemdik BAQ-tyń nazaryn aýdarǵan. Onyń táj kıip, koroldik kıimdegi bala kezindegi sýretteri búkil álemge taraǵan. Ol ótken aıda AQSh-ta qaterli isikten emdelip jatyp, 34 jasynda qaıtys boldy.
Ýgandada memleket basshysy saılaý arqyly anyqtalady. Alaıda elde brıtandyq otarlaý dáýirine deıin paıda bolǵan birneshe koroldik saqtalǵan. Olar dástúrli biregeılik pen tarıhı muranyń tiregi sanalady.
Oıony jerleý aldyndaǵy shirkeý rásiminde jınalǵandar onyń BUU-nyń izgi nıet elshisi bolǵanyn, AITV men JITS-ke qarsy kúresti qoldaǵanyn, sabyrly ári kóńildi jas retinde iz qaldyrǵanyn eske aldy.
– Ol korol atanyp, kópshilik eshqashan moınyna almaǵan jaýapkershilikti arqalasa da, kóńil kótergendi jaqsy kóretin sol balalyq minezin joǵaltqan joq, – dedi onyń ápkesi Rýt Komonteıl.
Korol gvardııasy qyzǵylt sary sháli taǵyp, Oıonyń tabyty qoıylǵan kólikti koroldiktiń astanasy Fort-Portal kóshelerimen koroldik qabirlerge deıin alyp bardy. Jerleý rásimine myńdaǵan adam qatysty.
Oıonyń jerlenýi onyń taqqa otyrǵanyna týra 31 jyl tolǵan kúni ótti. Rásim koroldik otbasy arasyndaǵy muragerlikke qatysty birneshe kúnge sozylǵan daýdan keıin uıymdastyryldy.
Sársenbide korol áýleti múshelerinen quralǵan komıtet Oıonyń nemere aǵasy, UBC memlekettik teleradıokompanııasynyń jańalyqtar júrgizýshisi ári redaktory Kıdjanangomany jańa korol etip tańdaǵanyn jarııalady.
Alaıda marqum koroldiń jaqyn týystary taq murageri onyń ósıetinde kórsetilgen, buryn kópshilikke belgisiz bolǵan uly bolýy kerek dep málimdedi. Oıo eshqashan úılenbegen. Onyń qaıtys bolǵany týraly koroldik premer-mınıstr málimdeme jasaǵanǵa deıin onyń balalary baryn eshkim bilmegen.
Kıdjanangomanyń jaqtastary Oıonyń otbasy boljamdy uly týraly tipti negizgi aqparatty da usyna almaǵanyn alǵa tartty.
Bul másele boıynsha kelissózderden habary bar derekkózdiń málimetinshe, juma kúni Ýganda bıligi Kıdjanangomaǵa taqtyń berilýin qamtamasyz etken.
Aıta keteıik, buǵan deıin Ýgandada Toro koroli IV Oıo Rýkıdıdiń 34 jasynda qaıtys bolǵanyn jazyp edik.
