UǴA tuńǵysh ret álemniń jetekshi ǵalymdaryn sheteldik múshe etip saılady
ASTANA. KAZINFORM — QR Prezıdentiniń janyndaǵy Qazaqstan Respýblıkasynyń Ulttyq ǵylym akademııasy álemdik ǵylymı qaýymdastyqpen yntymaqtastyqty nyǵaıtý jolynda mańyzdy qadam jasady.
Akademııanyń 2026 jylǵy 16 naýryzdaǵy № 1 Jalpy jınalysynyń sheshimimen alǵash ret Akademııanyń sheteldik músheleri saılandy. Bul sheshim otandyq ǵylymdy jahandyq ǵylymı keńistikke ıntegratsııalaýǵa, halyqaralyq ǵylymı áriptestikti damytýǵa jáne ozyq bilim men tájirıbe almasýǵa jańa múmkindikter ashady.
Akademııanyń sheteldik músheleri bolyp álemdik deńgeıdegi kórnekti ǵalymdar saılandy:
KRASNIKOV Gennadıı ıAkovlevıch — tehnıka ǵylymdarynyń doktory, professor, Reseı ǵylym akademııasynyń prezıdenti. Jartylaı ótkizgish qurylǵylar fızıkasy, mıkro jáne nanoelektronıka salasynyń jetekshi ǵalymy. Asa úlken ıntegraldyq shemalardy jasaý salasynyń mamany.
GO Hýadýn (郭华东) — Ph.D, professor, Qytaı ǵylym akademııasynyń akademıgi, Turaqty damý maqsattaryna arnalǵan Úlken derekter jónindegi halyqaralyq zertteý ortalyǵynyń dırektory (QHR). Jasandy ıntellekt jáne keńistiktik-ýaqyttyq modeldeý salasynyń jetekshi ǵalymy. Radıolokatsııalyq zondtaý jáne Jer týraly úlken derekter salasynyń mamany.
ShOBER Helmýt (Schober Helmut) — Ph.D, professor, Eýropalyq neıtrondyq zertteý ortalyǵynyń dırektory (Shvetsııa). Atom energetıkasy salasynyń jetekshi ǵalymy. Neıtrondyq fızıka jáne neıtrondardyń zatpen ózara árekettesýi salasynyń mamany.
ELLIOTT Mark Krıstofer (Mark C. Elliott) — Ph.D, professor, Garvard ýnıversıtetiniń vıtse-provosty (AQSh). Jetekshi sınolog-ǵalym, Qytaı men Eýrazııa tarıhy men saıasaty salasynyń mamany. Imperııalyq kezeńdegi Іshki Azııa boıynsha maman.
— Atalǵan sheshim Qazaqstan ǵylymynyń halyqaralyq deńgeıdegi bedelin arttyrýǵa jáne álemdik ǵylymı elıtamen tyǵyz baılanys ornatýǵa baǵyttalǵan. Sheteldik múshelerdiń qatysýy birlesken ǵylymı zertteýlerdi damytýǵa, ınnovatsııalyq jobalardy iske asyrýǵa jáne ǵylymı kadrlardy daıarlaý sapasyn arttyrýǵa yqpal etedi, — delingen habarlamada.
Qazaqstan Respýblıkasynyń Ulttyq ǵylym akademııasy aldaǵy ýaqytta da halyqaralyq ǵylymı yntymaqtastyqty keńeıtý jáne eldiń ǵylymı áleýetin damytý baǵytyndaǵy jumystardy júıeli túrde jalǵastyrady.
Budan buryn Ulttyq ǵylym akademııasy ǵylymı-tehnıkalyq forsaıt ortalyǵyn qurýǵa mindettelgen bolatyn.