UǴA akademıgi Alshynbaı Raqyshev «Qazaqstan Respýblıkasynyń ǵylymyn damytýǵa sińirgen eńbegi úshin» qurmet medalimen marapattaldy
ATY. 22 sáýir. QazAqparat /Názıra Eleýhan/ - Búgin Almatyda S.Asfendııarov atyndaǵy QazUMÝ-de ótken konferentsııada ǵylymdy damytýǵa qosqan úlken jetistikteri úshin Ulttyq Ǵylym akademııasynyń akademıgi
Alshynbaı Raqyshev Qazaqstan Respýblıkasy Bilim jáne ǵylym mınıstrligi atynan «Qazaqstan Respýblıkasynyń ǵylymyn damytýǵa sińirgen eńbegi úshin» qurmet medalimen marapattaldy.
Marapatty Bilim jáne ǵylym mınıstri Baqytjan Jumaǵulov tabys etip, Alshynbaı Raqyshulyn 80 jyldyq mereıtoıymen quttyqtady.
«Alshynbaı Raqyshuly kórnekti ǵalymdardyń biri emes, biregeıi. Ol alpys jyldan astam shyǵarmashylyq jáne pedagogıkalyq stajy bar tanymal dáriger-ǵalym ǵana emes, sonymen qatar, kóptegen talantty shákirt tárbıeledi, ǵylymdy damytýǵa, kadrlardy daıarlaýǵa jáne medıtsınalyq joǵary oqý oryndarynyń kazaqstandyq júıesin qalyptastyrýda úlesi zor. Akademık Raqyshev - álemdik arenada keńinen tanymal tulǵa. Ol iri ǵylymı forýmdar men konferentsııalarǵa qatysyp, elimizdiń atyn shyǵaryp, kóptegen baıandamalar jasady. 1980 jyly Parıj qalasynda Lazerlerdi medıtsınada qoldaný jónindegi Búkilálemdik qaýymdastyqtyń prezıdenti bolyp saılandy. Professor Raqyshevtyń ǵylymı qyzmetiniń taǵy bir qyryn erekshe aıtqym keledi. Álekeńniń kóp jylǵy ıgilikti isi - qazaq tilin óz salasynda baıytý jáne damytý, qazaq medıtsınalyq termınologııasyn qalyptastyrý boldy.Osy ispen stýdent kezinen aınalysyp keledi, ol anatomııalyq termınderdiń alǵashqy latynsha-oryssha-qazaqsha sózdigin shyǵarǵan. Osy eńbek joly ár kezeńde jalǵasyn taýyp otyrdy. Medıtsına ǵylymdarynyń doktory Densaýlyq saqtaý mınıstrliginiń janyndaǵy termınologııalyq komıssııanyń kóp jyldar tóraǵasy boldy, Qazaq ulttyq entsıklopedııasynyń bas redaktsııasynda jumys istep, kóptegen jetistikterge jetti. Bir konferentsııa sheńberinde akademık Rahyshevtyń barlyq sińirgen eńbegin aıtyp taýysý múmkin emes. Eń bastysy, bul - ár kezeńdegi birneshe ǵalymdar men stýdentterdiń asyl azamatqa, ǵalymǵa jáne ustazǵa degen qurmetiniń erekshe belgisi», - dedi mınıstr Baqytjan Jumaǵulov.
