UFC jeńilip kórmegen qazaqstandyq sportshyǵa usynys jasady
NUR-SULTAN. QazAqparat - Sharshy alańda jeńilip kórmegen qazaqstandyq sportshy Shavkat Rahmonovqa álemdegi eń mártebeli UFC promoýshen jekpe-jek ótkizýge usynys jasady. Bul týraly «BE STRONG PROMOTION» kompanııasynyń baspasóz qyzmetinen málim etti, dep habarlaıdy QazAqparat tilshisi.
«UFS aýyly alysta emes. Kúni keshe ǵana UFS Shavkatqa 20 sáýirde Sankt-Peterbor týrnırinde birinshi ret sharshy alańǵa shyǵýyn kózdeıtin 4 jekpe-jekke kelisimshart usynǵan bolatyn», - dedi «BE STRONG PROMOTION» vıtse-prezıdenti Asylbek Dúısenov.
Alaıda, qazaqstandyq sportshy mundaı usynystan bas tartyp otyr. Sebebi 30 naýryzda Shavkat Almatyda M-1 Global lıgasynyń chempıony ataǵy úshin tıtýldyq jekpe-jekke shyǵatyn bolady. Qarsylasy osyǵan deıin 14 aıqas ótkizip, onyń 10-ynda jeńiske jetken - Danıla Prıkaza.
«Komandamyz úshin, árıne, Shavkattyń ózi úshin de sheshim qabyldaý ońaıǵa soqqan joq. Bul máseleni «BE STRONG PROMOTION» prezıdenti Anatolıı Kımmen jáne Baıan Janǵalıevpen talqylap, qorytyndysynda Shavkat chempıon ataǵy úshin jekpe-jekke shyǵý sheshimin qabyldady. Onyń birneshe sebebi de bar. Birinshiden, kez kelgen isti sońyna deıin jetkizý qajet. Qazaqstannan shyqqan M-1 Global-dyń birinshi chempıony bolýy maqsatynda bir qadam qalǵanda tastap ketý qurmetke laıyqty emes is. Al biz Shavkat Rahmonovtyń óz maqsatyna qol jetkizýge daǵdylanǵanyn bilemiz», - dedi Asylbek Dúısenov.
Osy oraıda ol Shavkat ulttyq qurama sapyndaǵy eń jas sportshy bolǵan kezinde-aq áýesqoılar arasynda MMA boıynsha álem chempıony atanǵanyn eske saldy.
«Ekinshiden, Shavkat tıtýldyq jekpe-jek úshin uzaq joldan ótti jáne ózgelerge qaraǵanda chempıondyq ataq úshin kúresýge laıyqty. Barlyǵy da osy kezdesýdi taǵatsyzdana kútip otyr. Sondyqtan jankúıerler men týrnır uıymdastyrýshylarynyń úmitin aldaǵymyz kelmeıdi. Úshinshiden, eger Shavkat M-1 belbeýin jeńip alatyn bolsa, onda kelisimshartqa sáıkes ol ataǵyn keminde bir ret qorǵaýy tıis. Mine, osydan keıin ol UFC-di baǵyndyrýǵa daıyn bolady. Biz álemdegi eń mártebeli lıgaǵa jaı ǵana kirip qoımaı, onyń tarıhynda uzaq ýaqyt qalǵymyz keledi», - dedi ol.
