UFC reıtınginde qalǵan jalǵyz qazaqstandyq bir saty tómendedi

ASTANA. KAZINFORM – Aralas jekpe-jek boıynsha álemdegi eń iri uıym sanalatyn UFC ár salmaq dárejesi boıynsha sportshylardyń jańartylǵan reıtıngin jarııalady. Sońǵy tizimde Qazaqstannan tek bir ǵana sportshy bar.

Qazirgi tańda UFC reıtıngterinde Qazaqstan atynan tek jeńil salmaq dárejesinde óner kórsetetin Asý Almabaev qana qaldy.

Bir apta buryn ol jetinshi orynda turǵan. Sondaı-aq Asý 28 aqpanda Meksıkada ótetin jekpe-jekte jergilikti favorıt Brendon Morenomen kezdesýge daıyndalyp jatqan edi. Alaıda AQSh-qa ushardan eki kún buryn jattyǵý kezinde qolyn syndyryp alyp, jekpe-jekten bas tartýǵa májbúr boldy.

Bul jaǵdaı UFC reıtınginde de eskerýsiz qalǵan joq. Jańartylǵan tizimde qazaqstandyq sportshy segizinshi orynǵa syrǵydy. Buǵan deıin jetinshi orynda turǵan edi.

Al qarsylasy Brendon Moreno besinshi orynnan altynshy satyǵa tústi. Onyń ornyna japonııalyq Kıodjı Horıgýchı kóterildi.

Aıta keteıik, bir apta buryn jartylaı orta salmaqtaǵy reıtıngten shyǵarylǵan Shavkat Rahmonov ázirge tizimge qaıta oralǵan joq. Sebebi ol oktagonǵa 2026 jyldyń sońyna qaraı ǵana qaıta shyǵýy múmkin.

Buǵan deıin Jalǵas Jumaǵulovtyń «eýropalyq UFC»-degi tıtýldyq jekpe-jegi sensatsııa jasady.