UFC Konor Makgregordyń oktagonǵa qashan oralatynyn aıtty
NUR-SULTAN. QazAqparat - UFC prezıdenti Deına Ýaıt uıymnyń burynǵy chempıony, ırlandııalyq Konor Makgregordyń oktagonǵa qaı ýaqytta qaıtyp kelýi múmkin ekenin aıtty, dep habarlaıdy Sports.kz.
«Meniń oıymsha, Konor 2019 jyldyń sońynda nemese 2020 jyldyń basynda qaıtyp keledi. Qyrkúıektegi týrnırlerdiń qalaı ótetinin kóreıik. Joq, Konor Nýrmagomedov – Pore aıqasynyń jeńimpazymen judyryqtaspaıdy. Alaıda, bul jekpe-jekte kim jeńse de, dıvızıonda mańyzdy ózgerister oryn almaq», - dep Ýaıttyń sózin jetkizdi TMZ.
Makgregor 2018 jyldyń qazan aıynan beri rıngke shyqpaǵan. Ol reseılik Habıb Nýrmagomedovten jeńilip, arty jappaı tóbeleske ulasqan edi. Nátıjesinde eki sportshy da uzaq ýaqytqa bokstan shettetildi. Konor Makgregordyń ózi MMA-dan ketkenin málim etti, alaıda odan keıin birneshe ret qaıtyp keletinin meńzegen.
