UFC: Ismaǵulov jeńisinen keıin Qazaqstan men RF Týlaryn alyp shyqty
NUR-SULTAN. QazAqparat - Reseıde turatyn qazaq Damır Ismaǵulov Qytaıda ótken UFC Fight Night keshinde brazızııalyq Tıago Moızesty tize búktirip, rıngke Qazaqstan men Reseıdiń Týlaryn alyp shyqty, dep habarlaıdy QazAqparat tilshisi.
Orynbor (RF) MMA federatsııasynyń VKontakte paraqshasynda habarlanǵandaı, UFC Fight Night 157 keshi Qytaıdyń Shenchjen qalasyndaǵy «Universiade Sports Centre» arenasynda ótti. Damır Ismaǵulov bul joly brazılııalyq Tıago Moızespen jekpe-jekke shyqqan edi. Búkil aıqastyń basym bóligin qos qarsylas judyryqtasyp, tikesinen tik turyp ótkizgenimen, urymtal sátterdiń birinde Damır qarsylasyn alyp uryp ta úlgergen.
«Úsh raýnd boıy Damır aıqyn basymdyqty kórsetti. Mozes saýatty túrde qorǵana bilgenimen, qarsylasyna pármen tanyta alǵan joq. Alǵashqy raýndta zoryǵyp qalǵandyqtan, Damır ony jaqyndatpaı, alystan soqqy jasaýmen boldy. Nátıje – jeńis. Amerıkalyq promoýshende Damır Ismaǵulov úshinshi jeńiske jetip otyr», - delingen habarlamada.
Sondaı-aq, 15 mıllıonnan artyq jazylýshysy bar UFC-diń Instagram-daǵy paraqshasynda Damırdiń óz jeńisin erekshe sıpatta toılap jatqanyn kórýge bolady. Jeńiske jetkenin estigen qandasymyz ortaǵa shyǵyp, jerden keýdeni kóterý jattyǵýyn birneshe ret oryndap, kópshiliktiń qoshemetine ıe boldy.
«Tóreshilerdiń bir aýyzdan berilgen jeńisin dál osylaı kim toılaıdy?» - delingen UFC paraqshasynda. Sondaı-aq sportshynyń qolynan Qazaqstan men Reseıdiń Memlekettik týlaryn kórýge bolady.
Eske sala ketsek, Damır Ismaǵulov UFC aıasynda - ekinshi jáne kásibı mansabynda 18-inshi jeńisine Chehııanyń Praga qalasynda 145-shi UFC Fight Night týrnırinde qol jetkizgen bolatyn.
