UFC: Dııar Nurǵojaı Las-Vegasta qarsylasyn 4 mınýt 59 sekýndta jeńdi
ASTANA. KAZINFORM - Qazaqstan Respýblıkasy Qarýly kúshteri Arnaıy operatsııalar kúshteriniń áskerı qyzmetshisi, kishi serjant Dııar Nurǵojaı Las-Vegasta (AQSh) ótken UFC týrnırinde kezekti ret jeńiske jetti, dep habarlaıdy QR Qorǵanys mınıstrliginiń baspasóz qyzmeti.
Jartylaı aýyr salmaqta óner kórsetken qazaqstandyq sportshy Brazılııa ókili Brýno Lopespen kezdesti. Dııar Nurǵojaı qarsylasyn jekpe-jektiń birinshi raýndynda-aq tehnıkalyq nokaýtpen jeńdi.
Jekpe-jektiń sheshýshi sáti alǵashqy bes mınýttyń sońǵy sekýndtarynda boldy. Raýnd sońyna deıin joǵary qarqyn men jınaqylyqty saqtaǵan qazaqstandyq sportshy nátıjeli shabýyl jasap, qarsylasyna qysymdy kúsheıte tústi. Tóreshi jekpe-jekti alǵashqy raýndtyń aıaqtalýyna nebári bir sekýnd qalǵanda, ıaǵnı 4 mınýt 59 sekýndta toqtatty.
Osylaısha, Dııar Nurǵojaı joǵary fızıkalyq tózimdiligin, psıhologııalyq turaqtylyǵyn jáne barynsha shıelenisti jaǵdaıda da kásibı sheberligin saqtaı alatynyn dáleldep shyqty.
Mundaı qasıetter arnaıy maqsattaǵy bólimshelerdegi áskerı qyzmet úshin asa mańyzdy. Óıtkeni áskerı qyzmetshiden joǵary kásibı daıyndyq, tártip, ustamdylyq jáne erekshe qaýipti jaǵdaılarda senimdi áreket etý qabileti talap etiledi.
Buǵan deıin qazaqstandyq sportshy Brazılııa ókili Rafael Tobıasty jeńip, úsh raýndtyń qorytyndysy boıynsha tóreshilerdiń biraýyzdy sheshimimen jeńiske jetken.
-Jalpy, álemdegi aralas jekpe-jek boıynsha eń iri uıymnyń týrnırlerinde óner kórsetip júrgen Dııar Nurǵojaı 12 ret jeńiske jetip, ekeýinde jeńilis tapqan,-delingen habarlamada.
Osyǵan deıin Dııar Nurǵojaıdyń UFC-degi alǵashqy jeńisi týraly jazdyq.
