UFC-degi qazaq Damır Ysmaǵulov: Kelesi jekpe-jegim kóktemde ótedi
NUR-SULTAN. QazAqparat – UFC-de óner kórsetetin qazaq sportshysy Damır Ysmaǵulov kelesi jekpe-jegi qashan ótýi múmkin ekenin aıtty, dep habarlaıdy QazAqparat tilshisi.
«Baqytyma oraı alǵan jaraqatym tolyqtaı jazylyp, qaıta qalpyma keldi. Endi bir aptadan keıin tolyqqandy jattyǵýǵa kirisýge daıyn bolamyn. Menedjerimnen kelesi jekpe-jekke qashan shyǵa alatynymdy suraǵan edim. Jekpe-jekke shyǵý úshin salmaqty týrnırlerdiń birin kútip otyrmyz», - dedi ol Ortalyq kommýnıkatsııalar qyzmetindegi baspasóz máslıhatynan keıin QazAqparat tilshisine bergen suhbatynda.
Sonymen qatar ol aldaǵy jekpe-jegi shamamen qaı ýaqytta bolýy múmkin ekenin de aıtyp berdi.
«Menińshe, bir aıdyń ishinde, shamamen aqpanda UFC-degi kelesi, ıaǵnı tórtinshi jekpe-jegime qatysty máseleler anyqtalady. Al ózim kóktemge dep josparlap otyrmyn. Qarsylasym úzdik TOP-15-ke kiretin sportshy bolmaq. Tóbeleskim keletin sportshylar bar. Jalpy men kimmen jekpe-jekke shyqqym keletinin jıi aıtyp qoıamyn da, keıin ol bolmaı qalyp jatady. Sondyqtan aldyn ala aıtýdy doǵardym. Jekpe-jek bolsa óte jaqsy. Bolmasa kútýge týra keledi», - dedi Damır Ysmaǵulov.
Foto: ria56.ru
